O próximo mes de abril regresa o Festival CineEOI Coruña 2017, a mostra organizada polo Concello da Coruña e o equipo de dinamización lingüística da Escola Oficial de Idiomas que nace co obxectivo de promover a creatividade audiovisual en galego entre o alumnado da EOI da provincia, así como das Escolas de Arte e Superior de Deseño Mestre Mateo e Pablo Picasso, o Conservatorio Profesional de Música da Coruña e Ferrol e o estudantado do 3º ciclo de Educación Primaria, Educación Secundaria Obligatoria, bacharelato e Formación Profesional dos centros públicos e concertados do municipio coruñés. O festival, cuxa gala terá lugar o próximo 27 de abril, ten aberto ata o día 5 do mesmo mes o prazo de recepción de orixinais, cuxa duración non deberá superar os 10 minutos.

Para promover a participación entre o alumnado coruñés e promocionar o concurso, o Concello vén de abrir o prazo de inscrición para un Obradoiro de achegamento práctico ao proceso de realización dunha curtametraxe, un taller gratuíto e aberto ao alumnado dos centros educativos que participen nas categorías absoluta e xuvenil do VII Festival. Esta iniciativa, de 30 horas de duración e que combina parte teórica e práctica, será impartida polo realizador e guionista Omar Rabuñal Varela nos meses de xaneiro e febreiro de 2017 no Centro Ágora e no aula de informática da EOI.

Durante o taller abordaranse aspectos fundamentais como o guion, a linguaxe audiovisual, o equipo humano, a iniciación á edición ou cuestións técnicas como a iluminación e o son. O traballo final consistirá na gravación dunha curtametraxe duns 6 minutos de duración, na que se porán en práctica os coñecementos adquiridos ao longo do obradoiro.

A inscrición para o taller gratuíto de curtametraxes en galego xa está aberta e pode realizarse ata o próximo 30 de decembro a través da web municipal http://www.edu.coruna.es/