O Concello da Coruña organizará, este mes de maio, distintas actividades con motivo da celebración, o próximo 17 de maio, do Día das Letras Galegas, unha efeméride que este ano se dedica ao escritor Carlos Casares. Co gallo desta data, e dentro da programación prevista polo Goberno local para as próximas semanas, as Bibliotecas Municipais da Coruña organizan distintas actividades enfocadas a dar a coñecer a obra do autor homenaxeado e doutras mulleres da cidade, así como para afondar no papel que xogan as pequenas editoras galegas no fomento da lingua galega.

Así, o próximo venres, 5 de maio, terá lugar na biblioteca do Centro Ágora a xornada Ramalletes literarios, unha iniciativa que ten como obxectivo poñer en valor as letras galegas e o  traballo que fan as pequenas casas editoriais á hora de promover contidos alternativos en galego para o gran público, á vez que abren as portas as primeiras creacións de autoras e autores emerxentes. A xornada, aberta ao público, comezará ás 09.30 horas cunha visita ao centro, para dar a continuación paso, ás 10.30 horas, a unha charla coloquio na que participarán as editoras galegas Apiario, Patas de Peixe e Chan de Pólvora. Tras unha pausa para o café, Cristina Montero presentará a súa proposta de danza contemporánea Calvario e, ás 12.30 horas, o grupo desprazarase até o lugar da editora Apiario, na que se realizará unha visita guiada.

Esta iniciativa de apoio ás letras galegas, na que se pretende poñer en valor o idioma como valor de futuro e emprendemento, trasládase tamén ás redes sociais, nas que as Bibliotecas Municipais convidan á cidadanía a subir unha fotografía dun libro en galego, acompañado dun elemento natural --como unha flor ou ramallete--, e os cancelos #ramalletesbmc e #letrasgalegas2017.

Outra das actividades que terán lugar esta semana, e cuxo prazo de inscrición xa está aberto, é o Roteiro literario: En feminino, unha proposta na que a escritora Mercedes Queixas convida á veciñanza a percorrer as diferentes rúas da Coruña que levan nome de muller, co obxectivo de visibilizar o seu peso na historia da cidade, e dar a coñecer o seu traballo. O roteiro, que comezará ás 18.30 horas e terá unha duración de hora e media, iniciarase na rúa María Wonenburger, na zona do parque de Vioño, e rematará na Biblioteca Municipal Infantil e Xuvenil, na rúa Durán Loriga. Durante o traxecto, a veciñanza coñecerá a obra de mulleres coma Mariana Pineda, Sofía Casanova, Emilia Pardo Bazán ou Modesta Goicouría. Para participar nesta iniciativa é necesario realizar a inscrición previa na web municipal das bibliotecas.

 Xa na semana seguinte, o luns 8 ás 19.30 horas, a Biblioteca Municipal do Fórum Metropolitano acollerá un concerto de Xardín Desordenado, cuxo programa incluirá cancións con textos de Carlos Casares. Dous días máis tarde, o mércores 10, a agrupación repetirá esta homenaxe ao escritor na biblioteca de Estudos Locais. Tamén comezará ás 19.30 horas.

A programación municipal en relación ao Día das Letras Galegas 2017 completarase con outras actividades, que serán presentadas nas próximas datas polo edil de Culturas, José Manuel Sande.