O departamento de Promoción Económica dependente da Concellería de Emprego, Comercio e Mercados levará a cabo durante os meses de outubro e novembro formación dirixida a persoas emprendedoras e/ou empresas coa finalidade de dar apoio, asesoramento e formación para a mellora do mercado laboral no mundo do emprego por conta propia.

A metodoloxía para aplicar no curso será participativa e práctica, dirixida máis a unha formación con debate, diálogo e traballo compartido nas sesións, que a un formato tradicional de sesións maxistrais. A aplicación de casos, a resolución de dúbidas concretas e as dinámicas comparadas entre experiencias das distintas empresas asistentes marcarán o desenvolvemento das sesións.

Un experto con 20 anos de experiencia en postos de dirección e de análise e con capacidade pedagóxica e didáctica que permite o fluxo do coñecemento cara ás persoas asistentes e viceversa, nun ambiente de participación, será o docente encargado de levar a cabo esta formación.

Os cursos son de carácter gratuíto. As admisións serán por orde de solicitude, cun total de 22 prazas por curso.

Os cursos son os seguintes:

• Curso de Plan de Empresa
• Curso Claves para o financiamento da túa empresa
• Curso de Comercialización e venda

Máis información: Cursos de emprendimiento (coruna.gal)