Participou en proxectos de enorme relevancia. Así, en 1806 foi nomeado polo Goberno de España, Comisario das operacións para a medición do meridiano (Barcelona a Illas Baleares), un proxecto que formaba parte dunha iniciativa internacional dirixida por científicos franceses relacionados co establecemento do metro como medida universal. Tamén deu os pasos iniciais para a elaboración do primeiro mapa científico do territorio español.

A importante traxectoria de Rodríguez foi recoñecida con nomeamentos como o de director do Observatorio Astronómico e profesor de Astronomía do Museo de Ciencias Naturais de Madrid e o de catedrático de Astronomía da Universidade Central. Ademais, cómpre salientar o perfil político de Rodríguez, a súa actuación como cidadán responsable. Nese sentido, interesouse pola xestión e creación de institucións públicas que fomentaran unha ciencia actualizada.