goberno local da Coruña impulsa a creación dun Consello Municipal da Memoria Democrática, un órgano consultivo e de participación vinculado ás políticas municipais para a recuperación da memoria persoal e familiar das vítimas da guerra civil e a ditadura e a atención e apoio á súa descendencia directa. O alcalde da Coruña, Xulio Ferreiro, anunciou a súa inminente constitución -que se plasmará nun decreto que o rexedor asinará a próxima semana- durante a súa intervención na homenaxe á memoria dos homes que formaron parte do coñecido como Batallón Miliciano de Galicia, asasinados na Fonsagrada en 1937, un acto celebrado esta tarde xunto ao faro de Oza, e organizado polo Concello en colaboración coa Asociación pola Recuperación da Memoria Histórica (ARMH).

Como avanzou Ferreiro, o Consello nace coa finalidade de promover a reparación moral e a recuperación da memoria persoal e familiar daquelas persoas que padeceron persecución ou violencia por razóns políticas, ideolóxicas ou de crenza relixiosa durante a Guerra Civil e a ditadura, e para dar resposta ao establecido na Lei de Memoria Histórica e atender ás demandas das vítimas en termos de verdade, xustiza e reparación, "dentro do compromiso inalterable deste goberno local coa memoria". "Seguimos avanzando no traballo para a recuperación da memoria e a reparación e a restitución da dignidade ás vítimas, como a fixemos coa retirada do rueiro da cidade de todo referente da represión franquista, o que supón a adecuación á Lei de Memoria Histórica pero tamén un acto de xustiza para coas vítimas da ditadura, para a súa descendencia e para a cidade", salientou alcalde, que avanzou a futura creación dunha Oficina Municipal de Atención ás Vítimas, en consonancia coa moción impulsada polo grupo de goberno e aprobada polo Pleno municipal o pasado mes de febreiro.

O Consello da Memoria Democrática estará aberto á participación, tanto dos grupos municipais, como de asociacións, entidades, investigadores e historiadores que traballen pola recuperación da memoria histórica. A proposta do goberno local inclúe, ademais da representación do propio goberno coruñés -a través do alcalde, como presidente, e o concelleiro de Culturas- e do resto de grupos municipais, a dous membros designados pola Comisión pola Recuperación da Memoria Histórica da Coruña e representación do Ateneo Republicano de Galicia, da Real Academia Galega, do Instituto José Cornide de Estudios Coruñeses, ademais de dous membros designados pola Universidade da Coruña e dous profesionais da investigación ou historiadores de recoñecido prestixio designados polo alcalde, e tamén á directora do Arquivo Municipal.

Entre as funcións deste órgano estará a emisión de informes sobre aqueles proxectos ou programas relativos ás políticas municipais dirixidas á recuperación da memoria persoal e familiar das  vítimas da guerra civil e a ditadura e á atención e apoio aos seus descendentes directos, especialmente no referente á oficina de atención ás vítimas, así como o asesoramento e a proposición de medidas que contribúan á recuperación da memoria, ao restablecemento dos dereitos dos descendentes das vítimas e á mellor comprensión social das causas e consecuencias da persecución ou violencia durante a Guerra Civil e a ditadura. Do mesmo xeito, o Consello terá entre as súas competencias a de garantir a participación plural dos diferentes axentes sociais na formulación das políticas municipais de recuperación da memoria e apoio aos descendentes das vítimas, e a de impulsar a coordinación e cooperación con outras administracións públicas e entidades privadas que traballen na consecución dos obxectivos de recuperación da memoria democrática, ademais de promover espazos de estudo e debate en relación coas materias da súa competencia.

O acto celebrado esta tarde no peirao de Oza pechouse co descubrimento dunha peza  escultórica en homenaxe aos integrantes do Batallón Galicia realizada polo artista Jorge Pastor e que quedará instalada no porto de Oza, lugar no que a milicia partiu cara a Asturias o 5 de xaneiro de 1937, a bordo na lancha La Libertaria. Na homenaxe participaron, xunto co alcalde e representantes da ARMH, a familia de José Moreno Torres, comandante do Batallón Galicia, e representantes de entidades veciñais, sindicais e sociais da cidade- rendeuse homenaxe aos integrantes do Batallón Galicia.