O Concello da Coruña continúa colaborando coas localidades afectadas pola DANA co envío de recursos humanos e materiais á Comunidade Valenciana poñendo a disposición a Agrupación de Voluntarios/as de Protección Civil da Coruña, en colaboración coa ONG Farmamundi e o Banco de Alimentos Rías Altas.

Hoxe, mércores 20 de novembro, cinco persoas voluntarias da AVPC partiron cara a localidade de Paiporta en dous vehículos para axudar na rehabilitación de servizos esenciais como as farmacias. A alcaldesa, Inés Rey, despediu aos voluntarios xunto coa concelleira de Atención e Seguridade Cidadá, Montserrat Paz.

Na delegación da AVPC viaxan persoas con experiencia en traballos con electricidade, polo que portarán ferramentas e material para poder facer pequenas reparacións e apurar a apertura das farmacias. Un dos vehículos portará 428 quilogramos de material cedido polo Banco de Alimentos Rías Altas como vasoiras, capachos, máscaras, etc. que se destinarán ao propio persoal voluntario da Coruña para realizar os traballos nas farmacias, así como para donar aos veciños e veciñas de Paiporta.

Ademais, a AVPC recibiu unha donación anónima de mergulladores, luvas, máscaras, lentes e kits con diverso material de protección que tamén serán transportados.