SÁBADO 21 DE DECEMBRO ÁS 12.00 H

 Obradoiro: "Humor a primeira vista".

Obradoiro infantil de ilustración con Iván R. Un obradoiro para falar do humor gráfico para nenos e nenas de + 6 anos. Falaremos de como o humor pode estar feito con palabras e tamén con imaxes. Veremos exemplos do humor na prensa e nas redes. Remataremos ilustrando a nosa viñeta de humor gráfico coa situación coa que queiramos facer sorrir a alguén. Os nenos e as nenas escollerán un chiste para ilustralo nunha viñeta.

Duración: 1 hora

Idades: de 6 a 12 anos

Núm. de prazas: máximo 20

Inscrición previa en kioscoalfonso@coruna.gal 

SÁBADO 28 DE DECEMBRO ÁS 12.00 H

Obradoiro: "Escrita divertida".

Obradoiro infantil con María Lado. Este obradoiro está deseñado para estimular a imaxinación e a escritura a través da diversión e o humor. Aquí, as persoas participantes terán a oportunidade de crear historias únicas a partir de personaxes singulares e situacións disparatadas. Todo vale! A única regra é deixar voar a imaxinación, porque escribir é un acto de creación e, sobre todo, imaxinarnos mundos novos é unha experiencia divertida e enriquecedora! A través de dinámicas lúdicas e exercicios creativos, exploraremos diferentes enfoques narrativos, aprenderemos a darlles vida aos nosos personaxes e descubriremos como as situacións máis inesperadas poden dar lugar a relatos fascinantes. Ven e únete a nós nesta aventura literaria onde a risa e a creatividade son os protagonistas. Agardámoste cos brazos abertos.

Duración. 1 hora

Idades: de 6 a 12 anos

Núm. de prazas: máximo 20

Inscrición previa en kioscoalfonso@coruna.gal

DOMINGO 29 DE DECEMBRO ÁS 12.00 H

Obradoiro "Creación de personaxes con papel de agasallos"

Imparte Julia Abalde

Partindo dunha silueta de cartón como base, cada participante deseñará e daralle forma a unha personaxe única, dotándoa dun nome, características propias e intereses persoais que a definan. A continuación, darémoslle renda solta á creatividade vestindo e decorando a figura empregando papeis de cores, lazos, fitas, e outros materiais recuperados do lixo tras abrir os agasallos de Nadal. Este obradoiro de manualidades busca non só estimular a imaxinación e a expresión artística, senón tamén fomentar valores de reciclaxe e sustentabilidade, transformando refugallos en arte. Importante: é imprescindible que cada participante traia papeis de agasallo xa utilizados ou outros elementos sobrantes das celebracións de Nadal. Así, darémoslle unha segunda vida aos materiais e contribuiremos, de forma creativa, a reducir os residuos destas datas.

Duración: 1 hora

Idades: de 6 a 12 anos

Núm. de prazas: máximo 20

Inscrición previa en kioscoalfonso@coruna.gal

VERNES 3 DE XANEIRO ÁS 12.00 H

Sesión de contos con Caxoto

A sesión de contos de Caxoto ten como protagonista a "Barbavoa", unha encantadora obra infantil de Hematocrítico, publicada por Nórdica Libros, que forma parte da mostra "Hematocrítico Ilustrado". Os máis pequenos e pequenas terán a oportunidade de mergullarse de forma interactiva no divertido mundo de piratas que nos ofrece este libro. Ademais, poderán descubrir os debuxos orixinais que están expostos na propia sala, enriquecendo así a súa experiencia e fomentando a súa imaxinación. Será unha xornada chea de aventuras e sorpresas que non quererán perder!

Duración: 1 hora

Idades: de 4 a 9 anos

Núm. de prazas: máximo 25

Inscrición previa en kioscoalfonso@coruna.gal