A asociación veciñal Agra quere homenaxear esta semana o seu presidente de honra, Manuel María, ofertando no programa Agra no Ágora esta exposición e a representación de "O auto do Castromil" este xoves, 17 de outubro, ás 20:15 h no auditorio.

A exposición, comisariada pola Casa-Museo Manuel María, reflicte a personalidade e evolución da obra de Manuel María, así como distintos aspectos da súa figura como  a identificación coa terra e a paisaxe, o compromiso coa lingua, a diversidade de xéneros, o seu papel na literatura infantil galega ou a súa actividade política nacionalista. A mostra está composta por dez paneis elaborados a partir do material achegado pola Fundación Manuel María de Estudos Galegos.

Como todas as actividades do programa "Agra no Ágora", a exposición e o espectáculo teatral son de acceso libre e gratuíto; o programa está financiado polo Concello da Coruña e deseñado en colaboración coa Asociación veciñal Agra.