As actividades son gratuítas e requiren inscrición previa.

Por orde de chamada ata completar a capacidade, no teléfono 981 189 850

Apertura do prazo de inscrición: martes 4 de xuño ás 10.00 h

1. Visitas guiadas:

1.1. Museo Arqueolóxico e Histórico Castelo de San Antón

Percorrido polo Castelo de San Antón e as distintas seccións do Museo Arqueolóxico e Histórico

- Sábado: 12.00 e 18.00 h

- Domingo: 12 h

- Duración aprox.: 1 h e 15 min

- Público: adulto

- Prazas: 25

- Gratuíto con reserva previa

1.2. Castro de Elviña

Visitas guiadas ao Castro de Elviña, nas que percorremos o xacemento e coñecemos o proceso de escavación e os avances das últimas campañas arqueolóxicas.

- Sábado e domingo: 12.00 h

- Duración aprox.: 1 h e 30 min

- Público: adulto

- Prazas: 25

- Gratuíto con reserva previa

2. Talleres infantís de Arqueoloxía

2.1. Museo Arqueolóxico e Histórico Castelo de San Antón:

Sábado 15 : "FIANDO O FÍO"

Viaxamos ao pasado para descubrir a moda prehistórica e achegármonos ás formas de vida a través da súa indumentaria. Que materias primas utilizaban? Tiñan ferramentas como as que temos hoxe en día? Observaremos e manipularemos diferentes obxectos, como fusaiolas. Para rematar experimentaremos o traballo das tecedoras empregando un tear que nos permitirá facer o noso propio tecido de la.

Domingo 16: "ROCK ART. A PINTAR!"

Durante a actividade achegarémonos á prehistoria a través das pinturas rupestres. Falaremos dos animais xa extintos, do tipo de vida... pero, sobre todo, dos pigmentos naturais e das ferramentas utilizadas para a súa creación. Teremos tempo de descubrir e experimentar coas diferentes técnicas para que cada quen cree a súa propia obra de arte prehistórica.

- Hora: 11.45 h

- Duración aprox.: 1 h e 30 min

- Público: de 6 a 12 anos

- Prazas: 20

- Gratuítos con reserva previa

2.2. Castro de Elviña:

Sábado 15: "ARQUEOLOXÍA EN ACCIÓN!"

A través dunha escavación simulada a cativada poderá achegarse ao traballo dos arqueólogos e arqueólogas. Serán quen de descubrir obxectos vinculados co xacemento de Elviña para coñecer deste xeito as formas de vida das persoas que habitaron o castro. Ademais, faremos un pequeno percorrido polo xacemento para descubrir as estruturas que foron quedando á vista tras as diferentes campañas de escavación.

Domingo 16: "PROSPECCIÓN ARQUEOLÓXICA EN ELVIÑA"

Como saben os arqueólogos onde teñen que escavar? Como delimitan o espazo? Que ferramentas utilizan? Un percorrido dinámico polo castro de Elviña que lle permitirá ao grupo achegarse ao labor dos arqueólogos coñecendo os traballos previos de prospección e preparación do terreo e tamén os traballos de gabinete que permiten descubrir as historias dos muros e dos obxectos. Durante o camiño terán que ir completando unha serie de probas grupais para descubrir os segredos que se agochan en Elviña.

- Hora: 17.00 h

- Duración aprox.: 1 h e 30 min

- Público: de 6 a 12 anos

- Prazas: 20

- Gratuítos con reserva previa

3. Talleres de experimentación para persoas adultas no castro de Elviña

Sábado 15: "SOBREVIVINDO Á PREHISTORIA"

Viaxaremos á Prehistoria para coñecer de primeira man os avances tecnolóxicos que permitiron que a calidade de vida fose cada vez mellor. Lume, industria lítica e ósea e arte da cinexética, un cóctel perfecto para sobrevivir na Prehistoria. Experimentaremos con estes materiais para achegarnos ás dificultades de cada un deles e tamén para coñecer as actividades realizadas naqueles tempos.

- Hora: 19.00 h

- Duración aprox.: 1 h e 30 min

- Público: persoas adultas

- Prazas: 20

- Gratuíto con reserva previa