Os protagonistas das súas imaxes adoitan ser elementos que acha na súa realidade cotiá que reinventa para crear unha obra nova e independente de carácter multidisciplinar na que combina a fotografía con outros medios como a instalación, a pintura, a cerámica ou o vídeo. A presenza da natureza, a dualidade entre o racional e o visceral, entre o material e o onírico, as referencias á cultura clásica, e á historia da arte son elementos comúns do seu universo creativo.

O proxecto "Arquivo de Protocolos", parte da reflexión sobre os distintos procedementos que existen á hora de crear e de como eles se foron repetindo de maneira recorrente ao longo da Historia da Arte. Trátase dun proxecto que Gómez Chao comezou coa presentación dunha instalación efémera no Museo de Belas Artes da Coruña e que foi ampliando ao longo dos anos posteriores. O conxunto de obras que se presentan en Moret Art destacan tanto pola complexidade do proceso creativo, como pola potencia das metáforas visuais. Nunha parte delas, Gómez Chao volve a súa persoal ollada á Historia da Arte para construír fantásticos enganaollos a través da superposición de multitude de obxectos que se van revelando ao deternos neles e así podémonos achegar desde unha nova perspectiva ao barroco español ou á obra de Utamaru ou Klimt. Nas máis recentes, a creación abórdase a partir da destrución, e para iso o autor inmortaliza o instante no que distintas pezas de porcelana escachan en mil anacos e delas emerxe unha obra de grande elegancia e dinamismo.