O Concello da Coruña dá un paso máis na posta en marcha do programa municipal de atención e inclusión social ás persoas en situación de soidade non desexada coa incorporación de 18 traballadores e traballadoras para a execución do programa. 

Tal e como anunciara a alcaldesa, Inés Rey, o programa contará cun equipo profesional formado por dez traballadoras sociais, cinco educadoras sociais, tres técnicas de administración xeral e oito auxiliares de atención cidadá. O Concello nomeou esta semana a 18 das 26 previstas, incorporando xa ás dez traballadoras sociais e oito auxiliares. En proceso está o nomeamento das técnicas de xestión e educadoras socias que completarán o total do cadro.

O novo plan está deseñado para atender a todos os sectores da poboación afectados pola soidade non desexada, abordando a problemática de forma integral desde diferentes ámbitos. Así, prestarase atención a persoas maiores, persoas mozas, persoas con discapacidade, persoas en situación de desemprego e outros colectivos que, segundo os estudos, padecen este tipo de situación, incluíndo accións a nivel comunitario. Conta cunha duración inicial de tres anos e un orzamento total de 3,4 millóns de euros, dos cales 277.000 investiranse para a contratación deste primeiro equipo.

Coa contratación do persoal o Goberno de Inés Rey arrinca a primeira fase do plan co finde detectar de situacións de illamento social e soidade. Un diagnóstico xeral da cidade que se estenderá ata setembro do ano 2025.

Posteriormente, en xuño dese mesmo ano comezará xa a segunda fase, na que se elaborarán os proxectos de intervención cos datos obtidos, que deberán estar rematados en decembro do 2026. A execución de deses plans porase en marcha desde o ano 2026 en diante.