O concelleiro de Cultura e Turismo, Gonzalo Castro, presentou esta mañá o cartel completo do Flores Rock, que se celebrará no Barrio das Flores o venres 30 e sábado 31 de agosto. Banda Bassotti, Sínkope e Koma lideran un cartel no que o rock, o punk, o metal e o hardcore están moi presentes. 

"As festas da Coruña van moito máis alá de María Pita e amosan a súa versatilidade con iniciativas como este Flores Rock, unha iniciativa que parte do Barrio das Flores e os seus veciños e que desde o Goberno de Inés Rey apoiamos activamente", sinalou Castro. O edil estivo acompañado durante o acto de presentación de David Pujales e Paula Fernández, membros da Plataforma Vecinal Barrio das Flores.

Tamén actuarán durante as dúas xornadas outras bandas como Vantroi, Perpetual, Strikeback ou Deseqilibrio Mental. Ademais, Scarecrow e Declinare, primeira e segunda clasificada da batalla de bandas do Flores Rock, tamén ofrecerán un concerto o sábado 31. 

Por outra banda, o sábado 31 tamén haberá, dentro do programa do festival, o Campamento Flores Kids, con prazas limitadas. As persoas interesadas en inscribir ás súas crianzas, nadas a partir de 2019, poderán facelo en kids.floresrock@gmail.com antes do 25 de agosto. Haberá diferentes actividades lúdicas para os máis pequenos e, ás 17.00 horas, actuará A Gramola Gominola.

Ademais, haberá postos de comida para todos os asistentes durante ambas xornadas. O Flores Rock celebrarase na praza do Sol Nacente e a entrada será de balde.

Horarios

Venres 30 de agosto

• 20.30 horas. Deseqilibrio Mental
• 21.45 horas. Vantroi
• 23.00 horas. Escuela de Odio
• 0.15 horas. Banda Bassotti

Sábado 31 de agosto

• 13.00 horas. Declinare
• 14.00 horas. Scarecrow
• 17.00 horas. A Gramola Gominola
• 19.10 horas. Strikeback
• 20.15 horas. Perpetual
• 21.30 horas Sínkope
• 23.15 horas. Koma
• 1.00 horas. Bestas