O concelleiro de Cultura e Turismo, e responsable do servizo de Memoria Histórica, Gonzalo Castro, presidiu esta mañá o primeiro dos actos de colocación de novos 'stolpersteine', que lembran aos coruñeses deportados a campos de concentración nazis. Forma parte das accións promovidas polo Concello e a Asociación para a Recuperación da Memoria Histórica (ARMH) para conmemorar o Día Internacional en Recordo das Vítimas do Holocausto, que tiveron que ser adiados polo mal tempo.

"Desde o Goberno de Inés Rey somos conscientes do poder que teñen este tipo de actos para concienciar ás novas xeracións e evitar que os totalitarismos volvan a ter poder en Europa, por iso seguiremos a promover a colocación de novos 'stolpersteine' na cidade ata que todos os coruñeses que sufriron a lacra do nazismo sexan recordados", dixo Gonzalo Castro durante a súa intervención no acto celebrazo no número 134 da avenida de Santiago Rey Fernández-Latorre, xunto á praza do Tebeo. Neste acto lembrábase a figura de Víctor San Miguel Prado. 

Xa posteriormente, houbo actos inaugurais ante as lastras de Víctor Manuel Conde Núñez, no número 5 da rúa Cabana; de Martín Ferreiro Álvarez, no número 3 da rúa Mariscal Pardo de Cela; e de Adolfo Bregua Mouriño, no número 98 da avenida dos Mallos.

Ademais, este martes 11 ás 11.00 horas inaugurarase a lastra a José Albedro Villaverde, no paseo das Pontes, e o luns 24 ás 11.00 horas será a quenda da de Clemente Juan de la Cruz García, en Zalaeta. Tamén contarán coas súas Manuel Fernández Tarragó, Francisco Tallón Charlón, Enrique Tallón Charlón e José Martínez Cacheiro, nas rúas da Torre, A Franxa e as Xubias de Abaixo, respectivamente.