O Concello da Coruña autorizou á promotora Highfive Avenida de Arteixo o proxecto de execución dun novo edificio de 30 vivendas na Sagrada Familia, cuxo orzamento de execución é de 2,3 millóns de euros. O Goberno de Inés Rey xa aprobara a licenza o pasado mes de novembro en Xunta de Goberno Local para a construción do edificio, que tamén incluirá locais comerciais, rochos e garaxe.

Trátase do último soar baleiro da avenida de Arteixo, sito no nº 64 e lindeiro coas rúas Belén e Pontedeume. Ten unha superficie total de 974 metros cadrados, dos que 465,36 dedicaranse a un proxecto residencial. A propiedade cederá os restantes 508,64 metros cadrados ao Concello para a súa urbanización.

A cesión de máis da metade do espazo do soar ao Concello permitirá rematar a rúa Acanto, conectándoa así coa rúa Nazaret, actualmente illada por un muro. Ademais, o Goberno de Inés Rey prevén a creación dunha praza na rúa Pontedeume para o uso público, ampliando dese xeito os espazos de uso cidadá do barrio da Sagrada Familia.

O edificio constará de sete andares de vivendas e un ático, xunto con tres andares soterrados para aparcadoiro, con 37 prazas por andar, e trasteiros. O conxunto das 30 vivendas divídense en 7 de dous dormitorios, 22 de tres dormitorios e unha única de catro dormitorios. Ademais, o andar baixo disporá dun local comercial de 84,30 metros cadrados, con acceso directo desde a avenida de Arteixo e a rúa Acanto.