24 de noviembre de 2023
Inés Rey avanzou que neste mandato se executará a obra de humanización dos Cantóns, á que se destinarán 7 millóns de euros
O Goberno Local pechou o acordo orzamentario co BNG para impulsar a dinamización económica da cidade, a revitalización dos barrios, o benestar social, a igualdade de oportunidades e a mobilidade sostible
A alcaldesa, Inés Rey, acompañada polo voceiro do BNG, Francisco Jorquera, avanzou está mañá os detalles do acordo orzamentario pechado entre o executivo local e o BNG e que lle permitirá á cidade contar co maior orzamento da súa historia no próximo exercicio: 375 millóns de euros.
"Serán uns orzamentos progresistas porque están pensados por forzas progresistas, e porque buscarán apoiar a quen máis o precisa e mellorar a cidade en todos os seus barrios. Uns orzamentos que se artellan sobre catro eixes centrais e irrenunciables, o da dinamización económica da cidade e a revitalización dos seus barrios, o do benestar social e a igualdade de oportunidades, o da mobilidade sostible e o da promoción da cidade e o fomento de cultura, do deporte e do turismo", indicou Inés Rey durante a súa intervención.
A alcaldesa agradeceulle aos equipos negociadores encabezados por José Manuel Lage polo executivo local e por Francisco Jorquera polo BNG, a súa capacidade de diálogo e de chegar a puntos de encontro en beneficio da cidade.
O documento asinado por ambas as dúas partes, supón unha importante aposta polos barrios da cidade: "Impulsaremos un Plan de Mellora e Revitalización dos Barrios, desde o impulso a Xuxán, xa moi avanzado e crecendo con novas licenzas, á urbanización do Parque do Vixía en Monte Alto, barrio que tamén seguirá recibindo as inversións necesarias para finalizar o novo mercado, a nova escola infantil e a humanización da súa contorna cun proxecto de máis de 10 millóns de euros, ao que hai que engadirlle tamén a rehabilitación da Bágoa de San Roque. Peonalizaremos a rúa Sagrada Familia, impulsaremos o Plan Director do Barrio das Flores, crearemos unha nova biblioteca pública en Novo Mesoiro, converteremos o mercado de Palavea nunha biblioteca e unha aula de informática e, por suposto, poremos en marcha a obra do centro de saúde de Santa Lucía e remataremos a reforma de Vedoría", explicou Rey.
Ademais, o Concello seguirá a impulsar obras de humanización e mellora da cidade, actuacións que xa se puxeron en marcha durante o anterior mandato en máis de 30 rúas e prazas e que seguirá ata o 2027 con obras como a reforma de San Andrés, mais ás que se incorporan outros proxectos no orzamento do ano que vén, entre eles a peonalización dos Cantóns entre A Mariña e a praza de Mina, mellora que suporá un aporte de 7 millóns de euros de fondos municipais.
O acordo orzamentario contempla tamén a elaboración do Plan Estratéxico da Coruña 2025-2050 deseñado como unha ferramenta esencial para vertebrar o desenvolvemento económico da cidade, a redacción dun novo Plan de Mobilidade que estude todas as posibilidades que se abren coa nova concesión do bus urbano e a mellora e expansión de BiciCoruña; a posta en marcha dun ambicioso Plan de Inclusión Social así como dun específico de Saúde Mental, destinando tamén máis recursos á mellora e ampliacións das instalacións deportivas e culturais da cidade.
"Coido, en resumo, que temos chegado a un bo acordo, a un acordo que nos permitirá seguir avanzando como cidade e como sociedade seguindo a senda progresista que caracteriza as políticas dos que asinamos este documento", indicou Rey.
O documento asinado hoxe en María Pita suporá, ademais, que os orzamentos do 2024 poidan entrar en vigor no mes de xaneiro dese mesmo ano.
Lo sentimos pero tu navegador es muy antiguo para poder mostrar esta página. Debes de actualizarlo o usar un navegador compatible. Hemos optimizado esta web para Google Chrome, Mozilla Firefox, Opera, Safari y Microsoft Edge. Instalar ahora un navegador compatible