28 de setembro de 2023
O evento, que reunirá na Coruña a máis de 3.000 profesionais da industria musical de todo o mundo na súa 29ª edición, converterá A Coruña no epicentro da nova onda de talento musical
A pesar do carácter profesional do encontro, a organización sacou á venda tres modalidades de pases para que a cidadanía poida gozar da programación musical que aterrará na cidade
O encontro musical internacional WOMEX - Worldwide Music Expo, que se celebrará na Coruña do 25 ao 29 de outubro, sacou á venda un número limitado de entradas para que os coruñeses e coruñesas poidan gozar das diversas propostas musicais que aterrarán na cidade. O evento, que reunirá na Coruña a máis de 3.000 profesionais da industria musical de todo o mundo na súa 29ª edición, converterá A Coruña no epicentro dunha nova onda de talento musical coa presenza de promotores de concertos, representantes de artistas, selos discográficos, institucións, conferenciantes, xornalistas nacionais e internacionais e artistas de todo o mundo, nun completo programa que inclúe feira profesional, conferencias, cinema e concertos en formato showcases.
Diversos sons, ritmos e culturas reuniranse para celebrar a diversidade e a creatividade musical da man de artistas e profesionais da música de todo o mundo en diferentes espazos da cidade como Palexco, o Teatro Rosalía de Castro, o Teatro Colón, o Palacio da Ópera; a Filmoteca de Galicia, o Parrote, o Playa Club ou a Sala Pelícano.
Máis de 60 artistas e bandas procedentes de 40 países transformarán A Coruña na capital mundial da música. A programación, comisariada por un equipo de expertos, garante entreter ao público e mostrar o incrible talento de artistas emerxentes e de renome. A pesar do carácter profesional do evento, a organización puxo á venda un número limitado de entradas para que o público xeral tamén poida empaparse da multiculturalidad musical que chegará á cidade durante os días 26, 27 e 28 de outubro. Para iso, WOMEX creou tres modalidades de pases que se adaptan a todos os públicos e gustos.
O "Showcase Festival Pass", a opción máis completa, é válido do 26 ao 28 de outubro, e inclúe a entrada a todos os concertos nocturnos no Teatro Colón (Theatre Stage), Teatro Rosalía (Atlantic Connections Stage), o escenario do Parrote, a Sala Pelícano e o auditorio Palexco (offWOMEX Stage) pola noite. Tamén dá acceso ao programa de cinema que se desenvolverá na Filmoteca de Galicia. O Club Summit no Playa Club non está incluído nesta entrada e estará aberto só para delegados. A segunda modalidade de pase, "Pelícano & Parrote Stage Pass", inclúe o acceso aos concertos nocturnos que se celebrarán en ambos os lugares, a sala Pelícano e o escenario do Parrote, do 26 ao 28 de outubro. Por último, haberá unha opción dispoñible para os amantes do cinema coa entrada para o Programa de Cinema Público WOMEX 23, que se celebrará na Filmoteca de Galicia.
As entradas xa están á venda a través da web que WOMEX habilitou para o evento www.womex-festival.com, na que tamén está dispoñible toda a información relativa á programación de música e cinema. En canto aos pases específicos para o Programa de Cinema, ademais de en liña poderanse adquirir in situ no despacho de billetes da Filmoteca de Galicia.
A celebración na Coruña de WOMEX é unha das grandes apostas culturais do Goberno de Inés Rey para este 2023. "O desenvolvemento de WOMEX 23 constitúe unha oportunidade única para demostrar que a cidade é un referente internacional no ámbito da música e a diversidade cultural", sinalou a rexedora.
Selección oficial
26 de xuño de 2024
19 de xuño de 2024
18 de xuño de 2024
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible