O Concello da Coruña organiza festas e talleres infantís dentro da programación municipal de Nadal. O Goberno de Inés Rey deseñou un mes completo de actividades e actuacións para todo tipo de públicos. Neste caso, co obxectivo de facilitar a conciliación durante estas datas festivas, os centros cívicos dos barrios acollerán festas, obradoiros e visitas orientadas a nenos e nenas en idade infantil.

A partir deste venres, 13 de decembro, é posible inscribirse nas diferentes propostas. Para facelo, as persoas responsables das crianzas deberán acudir ao centro cívico no que queiran que participe o neno ou a nena. A inscrición levarase a cabo na conserxería do centro por orde de chegada ata completar a capacidade de cada acto. A participación é gratuíta e as e os participantes deberán ir acompañados/as dunha persoa adulta.

Por unha banda, o sábado 21 e o domingo 22 de decembro celebraranse talleres infantís para nenos e nenas de 4 a 12 anos. Estas actividades incluirán a visita de Papá Noel e serán en horario de mañá o sábado e de tarde o domingo. Os días 27, 28 e 29 de decembro e 3 e 4 de xaneiro haberá festas infantís, en horario de tarde, nos centros cívicos, que incluirán a visita dos Reis Magos.

Programación completa

Talleres infantís e visita de Papá Noel

• Sábado 21 de decembro, a partir das 10.30 horas, en Feáns, Castro de Elviña, Artesáns e Santa Lucía.

• Domingo 22 de decembro, a partir das 17.30 horas, na Sagrada Familia, Pescadores e A Silva.

Festas infantís e visita dos Reis Magos

• Venres 27 de decembro, a partir das 17.30 horas, en Novo Mesoiro, Elviña e Os Rosales.

• Sábado 28 de decembro, a partir das 17.30 horas, en Labañou, Monte Alto e Palavea.

• Domingo 29 de decembro, a partir das 17.30 horas, en Cidade Vella, O Castrillón e Novoboandanza.

• Venres 3 de xaneiro, a partir das 17.30 horas, en San Diego, Monelos e San Pedro de Visma.

• Sábado 4 de xaneiro, a partir das 17.30 horas, nos Mallos e Eirís.