6 de febreiro de 2025
O Concello habilitou un mapa dixital para consultar as incidencias de mobilidade previstas ao longo da xornada, cos desvíos alternativos
Manuel Vázquez, concelleiro de Deportes, lembrou hoxe que na C21 haberá lebres para cinco ritmos diferentes de carreira, co obxectivo de lles axudar ás persoas participantes na proba para lograr as marcas que buscan
Só quedan tres días para a disputa do medio maratón da Coruña, que volve este domingo 9 na celebración da súa XVII edición con case 2.000 persoas inscritas na proba e outras tantas na carreira da 5K, que complementa a C21.
Como xa é habitual en eventos deportivos deste calibre, o Concello definiu o dispositivo especial de tráfico e seguridade con vistas á xornada, que arrincará na madrugada do sábado ao domingo con cortes nos Cantóns.
Neste sentido, desde as 5.30 horas e ata a finalización da proba -que se prevé, aproximadamente, ás 15.30 horas-, quedará cortado o tráfico nos Cantóns, entre a praza da Mina e a rúa Alcalde Manuel Casas. Que esta medida se execute coa dita antelación é fundamental para facilitar a disposición dos servizos necesarios con vistas á carreira, que arrincará ás 9.30 horas desde o Obelisco.
Xa ás 7.30 horas activaranse os cortes previstos en Alfonso Molina e a avenida da Pasaxe. No caso de Alfonso Molina, o acceso á cidade por esta avenida discorrerá por Linares Rivas directamente cara á avenida do Porto. Na avenida da Pasaxe, tamén en sentido de entrada á cidade, desviarase o tráfico cara ao enlace de Casablanca. Está previsto que ambos os cortes poidan levantarse unha vez que a proba avance, aproximadamente ás 12.00 horas.
Ademais, ás 9.00 tamén se dará luz verde aos cortes previstos en Juana de Vega, as avenidas da Mariña e do Exército, Linares Rivas e Primo de Rivera, Ramón y Cajal, Alcalde Pérez Ardá, Salvador de Madariaga, Alcalde Marchesi e Posse. Todas elas forman parte do percorrido do medio maratón.
Estes cortes, do mesmo xeito que os anteriores, están previstos ata que a proba avance e se retire progresivamente a infraestrutura da carreira.
Un mapa dixitalizado para facilitar a consulta dos desvíos alternativos
Este ano, como novidade, o Concello habilitou un mapa dixital onde as persoas interesadas poderán consultar as principais alteracións no tráfico previstas este domingo no contexto da C21, así como os desvíos alternativos para o paso de vehículos nas rúas non restrinxidas ou afectadas polo percorrido da carreira.
Ademais, tamén se especifican as bases de BiciCoruña que estarán fóra de servizo este domingo, co gallo da carreira, facilitando, así mesmo, as estacións próximas que sirvan de alternativa.
O mapa, froito da colaboración entre as áreas de Mobilidade, Deportes e Seguridade Cidadá, foi ideado para a súa consulta en dispositivos móbiles. Xa está aberto e dispoñible nesta ligazón.
Haberá lebres para cinco ritmos diferentes de carreira
O concelleiro de Deportes, Manuel Vázquez, lembrou hoxe que as lebres volverán ao asfalto da Coruña este domingo 9 de febreiro na XVII edición do medio maratón, co obxectivo de lles axudar ás persoas participantes na proba para lograr as marcas que ambicionan na C21.
Haberá cinco ritmos diferentes de carreira: lebres para ir a 4 minutos por quilómetro (1h25'), a 4:15 (1h30'), a 4:30 (1h35'), a 4:45 (1h40'), a 4:59 (1h45'). Será a firma coruñesa The Cobardes a que equipará as lebres coa súa roupa técnica de running.
Vázquez subliñou que a Coruña21 pechou a súa inscrición con case 2.000 atletas e a carreira da 5K desbordou as súas previsións, con 1.987 participantes previstos. Todas e todos eles sairán ás rúas da cidade este domingo, a partir das 9.30 horas.
Tamén che pode interesar
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible