O vindeiro sábado 15 comezará a nova edición do circuíto de carreiras populares Coruña Corre, que arrincará na Torre de Hércules coa XIII Baixada Popular e a celebración da quinta Andaina Solidaria polo 8-M.

O concelleiro de Deportes, Manuel Vázquez, apuntou hoxe que xa son máis de 2.300 as persoas que se inscribiron con vistas á primeira data do calendario de Coruña Corre, que, como vén sendo habitual estes últimos anos, se organiza cunha perspectiva transversal e combínanse as probas de competición coas actividades programadas polo Día da Muller.

Este domingo 9, ás 23.59 horas, rematará o prazo para inscribirse. As persoas interesadas en participaren na carreira da Torre ou na andaina polo 8-M poden facelo a través da páxina web de Coruña Corre. Neste sentido, a concelleira de Benestar Social, Participación e Igualdade, Nereida Canosa, lembrou que a participación na andaina é gratuíta e animou a cidadanía a sumarse a esta proposta "que, ano tras ano, amosa a implicación e compromiso da Coruña coa igualdade".

A xornada deportiva comezará ás 17.00 horas no paseo dos Menhires

O Concello xa está a ultimar os preparativos de cara á xornada deportiva do sábado 15, que arrincará ás 17.00 horas no paseo dos Menhires, coas categorías inferiores. Abrirán camiño as nenas e nenos participantes na quenda de 'peques' e, xa a continuación, sairán as e os inscritos nas sub-10, sub-12, sub-14, sub-16 e sub-18.

Será ás 20.00 horas cando comece a carreira popular absoluta, cun percorrido de 6.625 metros e, pouco despois, ás 20.05 horas, sairán as persoas participantes na andaina solidaria, de case cinco quilómetros de trazado.