«Convivindo coa IA» é o título da charla a cargo de Alba Meijide, consultora independente de IA e PM, organizada pola Fundación CorBI na Domus o vindeiro mércores 25 de outubro ás 19.30 horas. A Intelixencia Artificial converteuse nunha constante nas nosas vidas, definindo a nosa relación tanto coa tecnoloxía como coas persoas. Esta charla realizará unha viaxe por distintas aplicacións de IA que afectan a sectores tan diversos como a medicina, o entretemento ou o deporte. Entender o impacto da IA no noso día a día será un factor clave para poder chegar a unha convivencia adecuada e explotar todo o seu potencial, mentres seguimos mantendo a nosa parte máis humana.

A coruñesa Alba Meijide é licenciada en Intelixencia Artificial por The University of Manchester, onde posteriormente completou os seus estudos co Master of Engineering en IA.

A súa actividade laboral comezou coa coordinación e xestión do congreso internacional Mundos Dixitais, e desenvolve a súa actividade profesional como consultora e deseñadora de proxectos baseados en Intelixencia Artificial para empresas tanto nacionais como internacionais en sectores tan variados como a medicina e as ciencias da saúde, os efectos visuais, o turismo ou o ámbito legal. Compaxinou estes proxectos co cargo de exhibition manager da exposición «AI: More than Human», na Coruña, unha mostra sen precedentes dos desenvolvementos creativos e científicos da Intelixencia Artificial, deseñando e xestionando tamén o desenvolvemento do único proxecto nacional incluído na mostra para a compañía galega ILUX Visual Technologies.