A edición 24-25 do programa educativo "Gargalladas. Novas xeracións na comedia", organizado polo Concello da Coruña a través do Servizo de Educación, chega ao seu fin o vindeiro xoves 27 de marzo, coa celebración dunha gala final na que os/as representantes de cada grupo defenderán os seus monólogos finais.

A gala, que terá lugar ás 17.00 horas no auditorio do Centro Sociocultural Ágora (Lugar da Gramela 17, 15010, A Coruña), terá unha duración máxima de dúas horas e contará cun formato profesional, divertido e televisivo. O evento contará coa participación de figuras destacadas do humor local, vídeos, premios e a gravación dos monólogos para a súa difusión nas canles do concello.

Gargalladas, un programa para "partirse de risa"

O programa educativo "Gargalladas. Novas xeracións na comedia", busca dinamizar o uso da lingua galega a través do humor, o formato monólogo e a expresión oral, proporcionándolle ao alumnado unha experiencia creativa e enriquecedora en colaboración con humoristas profesionais.