O martes 15 de outubro ás 18.00 h na Biblioteca Fórum, temos obradoiro en familia con Createctura "Historias en xogo". Está dirixido a familias con crianzas a partir dos 3 anos.

Createctura é un proxecto de investigación e innovación pedagóxica a través do deseño de espazos, a integración artística e o desenvolvemento da creatividade. Talleres de xogo e experimentación en familia nos que as persoas participantes terán a oportunidade de crear e explorar xuntas de forma interxeracional. As nosas escenografías habitadas promoven o xogo e a creación a través de diversas disciplinas como a arquitectura, as artes aplicadas, a fotografía etc. a partir de metodoloxías propias que son froito de anos de investigación pedagóxica. Neste taller ofrecen diferentes propostas de exploración en simultáneo. O ambiente está cheo de múltiples posibilidades de experimentación para gozar en familias, e atender a todas as necesidades diversas dos/as participantes.

Proponse realizar unha instalación de arte progresiva en dúas fases: unha primeira na que as familias que se acheguen á biblioteca teñan a oportunidade de transformar o espazo a través da construción de pequenas arquitecturas a modo de maqueta. Na segunda fase habitaremos as estruturas con personaxes e historias creadas a través dos recortes de libros vellos utilizando a imaxinación para narrar o proceso creativo que vivido. Xogando coas letras, os libros como obxecto e a luz a través das follas de papel, as familias formarán parte dunha performance improvisada polo xogo cos materiais dispostos. A través das distintas linguaxes as persoas participantes poderán explorar as características dos materiais espertando así a capacidade de asombro nas crianzas e recuperando a das persoas adultas.