O circuíto de carreiras populares Coruña Corre afronta este domingo a súa segunda proba do calendario nos barrios de Matogrande e Xuxán. Este ano, ademais, con novidades no percorrido, pois a saída tanto da proba absoluta como das categorías inferiores terá lugar na contorna da praza central de Xuxán, "integrando aínda máis a este barrio, que se incorporou o pasado ano ao circuíto grazas ao compromiso da nosa alcaldesa Inés Rey cos veciños e veciñas", sinalou Manuel Vázquez, concelleiro de Deportes. 

A recollida de dorsais para esta segunda proba estase a levar a cabo este sábado 5 de abril, en horario de 11.00 a 20.30 horas, no Cuatro Caminos Centro Comercial, que se incorpora nesta edición aos patrocinadores oficiais do circuíto. Ademais, mañá domingo, desde as 9.00 horas e ata unha hora antes de cada unha das probas será posible recoller o dorsal no colexio Liceo La Paz.

A carreira absoluta comezará ás 10.00 horas e hai máis de 1.700 persoas que confirmaron a súa participación. Seguidamente, ás 11.15 horas, tamén se levarán a cabo as probas de categorías inferiores, ata un total de seis. O trazado, de 6.640 metros, transcorrerá, ademais de polo Campus Universitario de Elviña e o barrio de Matogrande, polo barrio de Xuxán, onde se percorrerán os últimos 2 quilómetros da proba. A entrega de premios será a partir das 13.00 horas.

Toda a información desta carreira, así como unha recopilación das afeccións ao tráfico, pódense consultar neste mapa interactivo.

Datas do circuíto Coruña Corre 2025