A concelleira de Medioambiente, Noemí Díaz, asistiu esta mañá á XVI Asemblea da Rede Española de Cidades polo Clima realizada en Sevilla. En total, 368 administracións locais son membros da rede. No marco da asemblea, a entidade outorgoulle ao Concello o Premio ás Boas Prácticas Locais polo Clima recoñecendo a traxectoria da Coruña no desenvolvemento de políticas sostibles.

A concelleira recolleu o galardón e puxo en valor o modelo de cidade posto en marcha no pasado mandato, coa recuperación de espazos para o uso cidadán e a aposta pola mobilidade sostible, así como a creación de novas zonas verdes como o Corredor de Novo Mesoiro ou o Bosque de Breogán. A Coruña forma parte da rede dende o ano 2005 e foi unha das cidades fundadoras da rede e unha das primeiras de España en sumarse á loita polo clima.