As Festas de María Pita continuarán este luns 19 de agosto cunha nova sesión da Semana Clásica. Nesta ocasión, tras a Orquestra Sinfónica de Galicia e a Banda Municipal de Música da Coruña, actuará a Orquestra GAOS, que contará sobre o escenario co multiinstrumentista Abraham Cupeiro.

O concerto será ás 21.00 horas na praza de María Pita. O Goberno de Inés Rey apostou con esta programación das Festas de María Pita 2024 por unha ampla variedade de actividades para todos os públicos e idades, mantendo ciclos cun amplo percorrido como esta Semana Clásica.

O concerto da Orquestra GAOS con Abraham Cupeiro será unha actuación moi especial, pois o músico presentará na Coruña Mythos, o seu novo espectáculo. A Orquestra GAOS xa acompañou ao músico na xira de presentación en marzo e abril e agora retoman este proxecto conxunto para amosarllo á cidadanía coruñesa.

A Orquestra GAOS leva moitos anos participando na Semana Clásica das Festas de María Pita, tratando de sorprender cada ano ao público cun concerto diferentes e especial. Mythos buscará sumerxer ao público en mundos e cidades perdidas no tempo, nunha viaxe musical única a través de historiascreadas desde tempos inmemoriais.