O Concello da Coruña adxudicoulle á empresa Hercal Diggers S.L. as obras de demolición do esqueleto urbanístico existente no barrio do Martinete, traballos que se completarán, previsiblemente, no primeiro trimestre de 2025.

A estrutura, situada entre as rúas Mozart e Luís Peña Novo, comezou a construírse nos anos da crise financeira do 2008, mais a propiedade nunca chegou a completar as obras necesarias para darlle acceso ás vivendas, polo que o edificio ficou sen rematar e, polo paso do tempo e a conseguinte deterioración da estrutura, as obras declaráronse ilegalizables. 

O esqueleto ocupa un soar dunha superficie de máis de 1.100 metros cadrados, e co paso dos anos foi converténdose nun foco de insalubridade e maleza, entrañando tamén un risco para a seguridade das persoas pola súa progresiva deterioración. "A propiedade non asumiu as súas obrigas: nin rematou a construción para facilitar o acceso ás vivendas, e, a posteriori, tampouco se responsabilizou á hora de rehabilitar e manter a estrutura", apuntou hoxe o concelleiro de Urbanismo, Rehabilitación e Vivenda, Francisco Díaz Gallego.

Por este motivo, dado que a propiedade non atendeu aos requirimentos do Concello, e tras avaliar o estado do edificio, o Goberno municipal optou por recorrer á vía da execución subsidiaria de cara á súa demolición total. A licitación das obras aprobouse en Xunta de Goberno Local a mediados do pasado mes de maio, cun investimento de máis de 773.000 euros. Agora, o Concello avanza nos trámites para acometer a intervención, que, tras a súa adxudicación, terá que completarse nun prazo máximo de catro meses. 

Desta forma, o Goberno de Inés Rey dá continuidade ao plan de melloras previsto no Martinete e a súa contorna, onde tamén se está a levar a cabo a primeira fase de reurbanización da rúa Manuel Ferrol, arredor do residencial do Birloque. Esta actuación supón un investimento de máis de medio millón de euros.