O Centro Cívico de Mesoiro acolleu esta tarde o primeiro dos 11  encontros de barrio que o Goberno de Inés Rey pon en marcha no marco do estudo para a definición do novo modelo de autobús urbano. A sesión dá continuidade ao foro xeral celebrado o pasado sábado no Centro Sociocultural Ágora, marcando o inicio dunha rolda de encontros por distritos que se desenvolverán ate o mes de xuño.

A alcaldesa participou no encontro acompañada dos concelleiro Juan Ignacio Borrego e Yoya Neira. "Este proceso é unha oportunidade para escoitar directamente á veciñanza e construír, entre todos e todas, un modelo de transporte público útil, sostible e pensado para mellorar a vida diaria das persoas", destacou a rexedora.

En total, preto dun cento de persoas participaron activamente nunha sesión que combinou a presentación do equipo técnico do estudo do transporte urbano cunha dinámica participativa na que as persoas asistentes puideron achegar propostas sobre frecuencias, liñas, accesibilidade, conexións intermodais ou cobertura territorial.

Peticións e suxerencias

O distrito 9, onde se empraza o barrio de Mesoiro, conta con aproximadamente 12.500 habitantes articúlase en cinco liñas de autobús urbano (21, 23, 23A, 24, UDC) máis o BUH e cun total de 80 paradas. Os principais fluxos de mobilidade diaria prodúcense co distrito 7 (21.460 viaxes/día), co distrito 8 (10.287) e dentro do propio distrito 9 (9.626 viaxes internas).

Durante o encontro, púxose de manifesto o interese polo proceso participativo, xa que un 88% das persoas asistentes declararon acudir a título persoal, fronte a un 7% que representaban entidades asociativas e un 5% institucións públicas.

Ademais, os datos amosan un uso moi frecuente do transporte público urbano, con case un 40% de persoas usuarias diarias e outro 37% que o emprega ocasionalmente. En canto aos aspectos a mellorar, as persoas asistentes manifestaron nun 64% estar pouco ou nada satisfeitas co servizo actual, fronte a un 35% que declararon estar entre "algo" e "bastante" satisfeitas.

A enquisa tamén permitiu identificar cales son os aspectos máis valorados -e tamén os máis criticados- polos usuarios e usuarias do transporte urbano da Coruña. Nunha escala do 0 ao 10, os prezos foron o elemento mellor valorado, cunha media de 6,7 puntos, seguidos da accesibilidade (4,5) e das liñas e paradas (3,3). Pola contra, os aspectos que recibiron unha valoración máis baixa foron a intermodalidade (2,5), a frecuencia dos servizos (2,8) e o estado das marquesiñas (3,2), evidenciando puntos febles relevantes que urxen ser abordados no novo modelo de transporte.

Neste sentido, a cidadanía identificou como ámbitos prioritarios de mellora a frecuencia e tempo de espera dos autobuses, seleccionada por un 91% das persoas participantes, seguida da intermodalidade con outros medios de transporte (56%) e a adaptación de liñas aos barrios e novos puntos de interese (49%). Outros aspectos sinalados foron a accesibilidade (29%), a innovación dixital (21%), a sustentabilidade (16%), a concienciación e impulso ao uso do transporte público (13%) e, en menor medida, os prezos (12%), o que confirma que, malia ser un servizo con marxe de mellora, o custo non se percibe como un dos principais problemas actuais.

Próximos encontros