O Centro Sociocultural Ágora acolleu hoxe unha nova edición de Oficios en Acción, a festa da artesanía organizada polo Concello da Coruña en colaboración coa Asociación Galega de Artesáns. Centos de persoas participaron ao longo da xornada nas distintas actividades, obradoiros e demostracións en vivo, nun evento pensado para divulgar, preservar e poñer en valor os oficios artesanais galegos.

A iniciativa, que se enmarca nas políticas do Goberno de Inés Rey de apoio á cultura e ao tecido creativo local, consolídase como unha cita de referencia na cidade para a difusión da artesanía. Durante todo o día, as aulas do Ágora enchéronse de actividade, acollendo obradoiros nos que as persoas participantes puideron aprender técnicas como a encadernación xaponesa, a creación de xoiería en cera, a elaboración de pezas de cerámica con técnica Kurinuki ou o traballo co coiro, entre outras.

A concelleira de Emprego, Comercio e Mercados, Diana Cabanas, que asistiu á xornada, puxo en valor o carácter didáctico e participativo da actividade, subliñando "a importancia de seguir creando espazos que permitan á cidadanía achegarse aos oficios artesáns e recoñecer o seu valor como parte do noso patrimonio cultural", sinalou.

A diversidade de propostas, repartidas en cinco aulas do centro, permitiu que persoas de todas as idades puidesen gozar dunha xornada aberta e gratuíta. Desde familias con nenos ata persoas interesadas no mundo da artesanía profesional, todas atoparon espazos de aprendizaxe e inspiración.

A organización lembra que, debido ao éxito de participación e á limitación de prazas, é recomendable realizar a inscrición previa para futuras edicións do evento a través da web oficial da Asociación Galega de Artesáns.

O Concello da Coruña anima a continuar apoiando a artesanía local como expresión viva da nosa cultura e motor de dinamización social e económica.