Un total de 104.000 persoas asistiron este domingo ao percorrido da Cabalgata de Reis na cidade da Coruña, unha das celebracións máis agardadas destas festas de Nadal, que xa chegan á súa recta final.

A alcaldesa, Inés Rey, acompañou ás SSMM os Reis Magos nos instantes previos ao inicio da cabalgata, que partiu ás 18.00 horas da rolda Camilo José Cela, entre Monelos e o Barrio das Flores, para continuar posteriormente por Alcalde Pérez Ardá, Fernández Latorre, as avenidas Primo de Rivera e Linares Rivas e a praza de Ourense, ecuador do trazado.

A comitiva, composta por máis de 800 persoas repartidas nas diversas carrozas e compañías artísticas incluídas na cabalgata, avanzou a continuación polos Cantóns, a Marina e, xa finalmente, María Pita, onde a rexedora recibiu novamente a Gaspar, Melchor e Baltasar, antes de abrirlles camiño ao balcón do Palacio Municipal, onde os grandes protagonistas da xornada saudaron ás nenas e nenos que se achegaron á praza.

"Como cada ano por estas datas, A Coruña e a nosa xente viven con moitísima ilusión un día tan sinalado como este no calendario do Nadal. Máis alá dos agasallos, os Reis Magos trouxeron hoxe ledicia ás nosas rúas e alegría ás familias e á rapazada da nosa cidade, e iso é de agradecer", apuntou Inés Rey.

O dispositivo de seguridade e organización, integrado por unhas 200 persoas

A rexedora tamén puxo en valor o compromiso e implicación das case 200 persoas que integraron o dispositivo de organización e seguridade da cabalgata este domingo 5 de xaneiro. Máis dun cento delas, pertencentes á Policía Local, os Bombeiros da Coruña, Protección Civil, Cruz Vermella e ambulancias sanitarias, ás que acompañaron outras 90 persoas voluntarias, que ao longo do día contribuíron nas tarefas de loxística, mobilidade e asistencia á cidadanía.

"O seu traballo, antes, durante e tras a cabalgata, é fundamental para garantir a celebración dos festexos con todas as garantías de seguridade, facendo posible que as coruñesas e coruñeses disfruten de xornadas como esta", destacou Inés Rey.

A cabalgata transcurriu sen incidentes malia a alerta por mal tempo, permitindo que moitos nenos e nenas puideran gozar dela no día previsto e con mínimos cambios no percorrido para evitar as rúas con máis vento. Finalmente a choiva tamén respetou aos milleiros de cidadáns que saíron á rúa a ver o paso dos reis.