Este sábado 7 de setembro terá lugar o II Gran Premio de Ciclismo en Ruta Cidade da Coruña, evento que reunirá a máis de 250 ciclistas participantes de diferentes categorías masculinas, femininas e adaptada. Será nas proximidades do Palacio dos Deportes de Riazor onde se instalará o circuíto polo que transcorrerán as probas de ciclismo. O Goberno de Inés Rey organiza xunto ao Club Triatlon Coruña este evento co obxectivo de promover o ciclismo e o deporte entre os coruñeses e coruñesas, sobre todo entre a mocidade.

Nesta segunda edición a competición conta coa participación de máis de medio cento de clubs de ciclismo das catro provincias galegas, chegando ao límite de 300 participantes e erixíndose como unha das grandes competicións de ciclismo do panorama autonómico. O percorrido será o seguinte: saída desde o cruzamento da avenida de Bos Aires coa avenida da Habana, glorieta das Escravas, paseo de Rolda, San Roque de Fóra con Sor Joaquina e regreso ata a liña de meta. Esta é a segunda edición deste evento organizado polo Club Tríatlon Coruña coa colaboración do Concello da Coruña, Federación Galega de Ciclismo e Cruz Vermella.

O horario da competición será de 16.00 a 21.00 h. Os ciclistas que teñan que recoller os seus dorsais poderán facelo o mesmo sábado desde as 14.30 ata as 15.30 en Riazor. Ademais do circuíto, habilitarase no aparcadoiro do Palacio dos Deportes unha zona de xincana para as categorías inferiores. A entrega de trofeos realizarase ás 18.30 e ás 21.00 horas aproximadamente coa presenza do concelleiro de Deportes, Manuel Vázquez, e un representante da Federación Galega de Ciclismo.

Os horarios das probas son os seguintes:

• Inicio da competición: 16.00 horas.
  • 1ª manga: promesa masc/fem, 1 volta a 1 quilómetro
  • 2ª manga: principiantes masc/fem, 2 voltas a 2 quilómetros
  • 3ª manga: alevín masc/fem, 7 voltas
  • 4ª manga: infantil masc/fem, 10 voltas
  • 5ª manga: cadete masc (eliminación)
  • Paralelamente ás probas se desenvolverá o circuíto adicional: xincana para promesas e principiantes.
• Entrega premios: 18.30
  • 6ª manga: ciclismo adaptado (voltas segundo participación)
  • 7ª manga: júnior masc (eliminación)
  • 8ª manga: élite - sub23 fem + junior fem + cadete fem + master fem (eliminación)
  • 9ª manga: élite - sub23 + masters masc (eliminación)
• Entrega premios: 21.00