O Concello amplía a máis usuarios a fase de probas previa á implantación da aplicación móbil que permitirá pagar o transporte urbano mediante códigos QR. Esta iniciativa, impulsada polo Goberno de Inés Rey a semana pasada, comezou coa apertura temporal do novo sistema a un milleiro de usuarios de iOS, cupo que se cubriu en só 24 horas, sen que se detectasen incidencias.

Por iso, este martes ampliouse o cupo a outras mil persoas máis, usuarias de dispositivos iOS, co obxectivo de seguir testeando progresivamente o funcionamento da aplicación de cara á súa implantación definitiva. Toda vez remate a fase de probas, en aproximadamente un mes, a aplicación estará operativa tanto para iOS como para Android.

Neste sentido, co obxectivo de mellorar a experiencia das persoas usuarias, tamén se creou un apartado específico na APP Coruña onde comunicar as posibles incidencias que se detecten á hora de proceder aos pagamentos nas terminais dixitais dos autobuses. Nesta fase, a comunicación de incidencias mediante a aplicación é fundamental para detectar posibles erros e deseñar a versión definitiva da app.

Cómpre lembrar que, ademais dos métodos de pago dixitais, as persoas usuarias do transporte urbano tamén poden usar a tarxeta Millennium en formato físico para aboar o custo dos billetes.

A activación da tarxeta virtual para dispositivos iOS, na APP Coruña

As persoas usuarias do transporte urbano que desexen realizar o pago dos billetes con dispositivos iOS mediante a lectura de códigos QR deberán configurar a súa tarxeta virtual Coruña Millenium na APP Coruña. Para isto é preciso, en primeira instancia, darse de alta ou contar previamente cun perfil de usuario ou usuaria na propia app cidadá.

Para proceder á instalación da tarxeta virtual Coruña Millenium, as e os usuarios con dispositivos iOS que a proben deberán clicar no icono 'Autobús' do menú principal da app, e configurar a tarxeta virtual na sección 'Tarxetas de transporte'. Cómpre lembrar que, entre as melloras incluídas nesta actualización para iOS, está a da posibilidade de realizar recargas dun mínimo de 5 euros, mediante o uso dunha tarxeta bancaria de crédito ou débito, de calquera entidade e sen comisións para o usuario.

Á hora de realizar o pago mediante a lectura de código QR, a ou o usuario poderá proceder á operación achegando o seu dispositivo móbil ao lector instalado en todas as cabinas de acceso das liñas de autobús urbano. No procedemento de pago, a persoa usuaria poderá aboar o custo de ata cinco billetes como máximo.

Como medida de carácter auxiliar, o Concello habilitou na APP Coruña un tutorial QR para orientar ás persoas usuarias con dispositivos iOS á hora de realizar os pagos no transporte urbano.

O tutorial especifica, por exemplo, como xerar o código QR desde a app e, posteriormente, como colocar o móbil fronte á maquina de validación do autobús á hora de escanear o código.