A Xunta de Goberno Local aprobou hoxe os proxectos de reforma dos centros cívicos municipais de Labañou, San Diego, O Castrillón e Os Rosales.

Estas actuacións, impulsadas pola alcaldesa Inés Rey dentro do plan de mellora progresiva dos centros cívicos da cidade, supoñen un investimento conxunto próximo aos 1,58 millóns de euros, co seguinte desglose por centro: Labañou (709.462,45 €), San Diego (208.104,25 €), O Castrillón (346.995,29 €) e Os Rosales (313.172,96 €). Trátase de actuacións recollidas na primeira fase do Plan de Renovación dos Centros Cívicos da cidade, un plan que suporá un investimento total de 3 millóns de euros e que permitirá aplicar melloras en todos os centros cívicos da cidade. 

Cada un dos catro proxectos contemplan diversas obras de modernización e acondicionamento destas instalacións municipais, cun prazo de execución estimado de entre 3 e 4 meses segundo o centro, e permitirán mellorar a eficiencia, seguridade e confort destes espazos de convivencia para a veciñanza.

A alcaldesa Inés Rey, acompañada hoxe pola concelleira de Benestar Social, Participación e Igualdade, Nereida Canosa, salientou que este conxunto de actuacións "vai poñer ao día catro centros cívicos de barrios da Coruña, que levan décadas dando servizo e precisaban unha renovación. Con este importante investimento, imos mellorar a accesibilidade, a eficiencia enerxética e o estado xeral destas instalacións, reforzando o seu papel como punto de encontro e de servizos para os veciños e veciñas". Rey incidiu en que as obras "responden ás demandas da cidadanía e permitirán ofrecer espazos públicos máis cómodos, seguros e preparados para as actividades cotiás nos barrios".

Centro cívico de Labañou

Cun orzamento de 709.462,45 €, o proxecto consiste nunha reforma parcial da envolvente do edificio e das súas instalacións. Substituirase a cuberta metálica actual por paneis illantes tipo sándwich para eliminar filtracións e mellorar o illamento térmico, e instalarase unha nova claraboia con mellores prestacións de estanqueidade. Tamén se renovarán todas as ventás e acristalamentos exteriores do centro e limparase a fachada de pedra, reparando xuntas e pezas danadas. Ademais, mellorarase a recollida de augas pluviais con novos canalóns interiores e baixantes en fachada​. No interior, reporanse os falsos teitos e acabados que estaban deteriorados tras anos de uso​. O prazo estimado de execución é de 4 meses, ao termo dos cales o centro contará cunha envolvente renovada que aumentará a eficiencia enerxética e o confort térmico, en beneficio de todos as persoas usuarias.

Centro cívico de San Diego

Cun investimento de 208.104,25 €, levaranse a cabo traballos de conservación e mellora da fachada, cuberta e elementos exteriores do edificio. Actuarase sobre a fachada principal para limpar e pintar os paramentos exteriores, á vez que se instalarán sistemas de protección para evitar a nidación de aves no edificio​. En canto ás fiestras, substituiranse os vidros danados do gran muro cortina acristalado e arranxaranse os seus ferraxes, co selado perimetral de todas as xuntas para garantir a estanqueidade​. Na cuberta, o proxecto prevé a limpeza e reparación da estrutura metálica existente, incluídos os canalóns e os faldóns do tellado, a renovación das baixantes de pluviais e a reparación puntual do forxado onde fose necesario​. Ademais instalarase unha liña de vida homologada na cuberta para permitir futuros mantementos con seguridade​. Estas obras, cun prazo aproximado de 16 semanas, permitirán renovar a imaxe exterior do centro cívico e prolongar a súa vida útil, garantindo condicións axeitadas de salubridade e seguridade para a veciñanza usuaria de San Diego.

Centro cívico do Castrillón

No caso do centro cívico do Castrillón, compartido coa biblioteca municipal homónima, o proxecto aprobado (orzamento de 346.995,29 €) inclúe reparacións tanto no exterior como no interior do edificio, así como a instalación dun novo sistema de climatización. No exterior actuarase sobre a cuberta e fachadas: limparase a vexetación e sucidade acumulada nas cubertas e desatascaranse os desaugadoiros​; reporanse elementos de seguridade como a liña de vida e a porta de acceso á cuberta; selaranse ventás e xuntas para evitar humidades e arranxaranse pequenos danos no revestimento de fachada (limpeza de grafitis e reposición dalgunha lousa de pedra)​. No interior, está prevista a pintura de paredes, substitución de pezas deterioradas (mecanismos de porta de emerxencia, peitorís de ventás, algún pavimento levantado ou roto)​, co obxectivo de mellorar o aspecto e funcionalidade das salas. Por outra banda, dotarase á biblioteca infantil dun sistema moderno de climatización e ventilación, para o cal se retirará a instalación antiga de calefacción por paneis do falso teito e instalaranse novos equipos de aire acondicionado quente-frío adaptados a este espazo. O prazo de execución estimado é de aproximadamente 14 semanas. A reforma permitirá solucionar deficiencias de mantemento acumuladas nos últimos anos e ofrecer unhas instalacións máis confortables tanto para os usuarios do centro cívico como para os da biblioteca do municipal, especialmente os nenos e nenas da sala infantil que disporán de climatización axeitada.

Centro cívico dos Rosales

Por último, no centro cívico dos Rosales -integrado no edificio que alberga tamén a biblioteca municipal deste barrio -investirase 313.172,96 € nunha reparación integral da cuberta do inmoble. A cuberta actual, que é transitable a modo de praza pública, presenta problemas de filtración de augas que afectan as salas da planta superior e da biblioteca. O proxecto contempla a impermeabilización completa da cuberta con novos materiais de altas prestacións, substituíndo a antiga impermeabilización por unha membrana continua de poliurea en quente sobre toda a superficie​. Para iso será preciso levantar o pavimento existente e realizar obras complementarias: prolongaranse os petos perimetrais e elementos do tellado para asegurar a estanqueidade e instalarase unha nova rede de recollida de pluviais con canaletas lineais que faciliten a evacuación da auga​. Unha vez renovada a capa impermeable, reporanse o acabado do solo na praza superior e as barandas de protección, ancorándoas de forma que non perforen a nova impermeabilización​. Con esta actuación, que terá un prazo aproximado de 4 meses, eliminaranse definitivamente as goteiras e humidades que viña sufrindo o centro, preservando a biblioteca e demais instalacións interiores. A veciñanza dos Rosales gañará así un centro cívico máis seguro e cómodo, ao tempo que se acondiciona a praza-cuberta superior que forma parte do espazo público do barrio.

Estas catro intervencións nos centros cívicos de Labañou, San Diego, O Castrillón e Os Rosales enmárcanse no compromiso do Concello da Coruña por manter e actualizar a rede de centros cívicos municipais. Tras a reforma integral do centro cívico do Birloque -que se abrirá á cidadanía o vindeiro xoves- e a rehabilitación integral da Casa Veeduría, o Goberno de Inés Rey impulsa agora esta primeira fase dun plan de renovación dos centros cívicos, cun investimento total próximo aos 1,8 millóns. 

"Ao mesmo tempo, este plan revaloriza unha das esencias dos gobernos socialistas da nosa cidade: os centros cívicos, que son un modelo a seguir en moitas localidades do país. Este Goberno continúa aumentando e mellorando a rede, que agora aumenta hasta os 23 centros distribuídos estratexicamente para atender ás necesidades dos veciños, ofrecendo espazos de proximidade, encontro, actividade e participación que fomentan a cohesión e o benestar comunitario", indicou a alcaldesa.

Orzamentos Municipais 2025

Tamén esta mañá, a alcaldesa informou de que a Xunta de Goberno Local desbotou as alegacións presentadas ao proxecto dos Orzamentos Municipais 2025, "ao non respostar ningunha delas aos supostos recollidos no artigo 170 da Lei de Facendas Locais".

Cómpre lembrar que os Orzamentos Municipais deste ano quedaron aprobados inicialmente hai 15 días. Agora, o seguinte paso será a dación de conta no Pleno do Concello, o que suporá a entrada en vigor "das contas máis elevadas das aprobadas na cidade, con 379 millóns de euros e investimentos de mellora en todos os barrios".