O Consorcio para a Promoción da Música, organismo do que depende a OSG, celebrou esta mañá unha Xunta do Goberno presidida pola alcaldesa, Inés Rey. 

Como representante do Goberno municipal estivo presente, ademais da alcaldesa, o concelleiro de Cultura e Turismo, Gonzalo Castro. Na xunta asistiron tamén representantes do resto dos grupos da corporación así como da OSG e de Amigos da Ópera, ademais da delegada territorial da Xunta, Belén Docampo, e o secretario xeral de Cultura, Anxo Lorenzo.

No encontro abordáronse diversos aspectos de carácter financiero do funcionamento do consorcio. Castro celebrou o incremento da achega por parte da Xunta ao organismo, con 300.000 euros, atendendo á petición que fixera no seu día Inés Rey ao presidente da Xunta, e que se traduciu tamén nunha achega de 300.000 euros o ano pasado. Con estas subas o Concello pretendía que a Xunta revertera o déficit de financiamento da Sinfónica durante os últimos anos. 

Castro apuntou tamén que desde o Concello se está a traballar, da man do Consorcio, na elaboración dun plan estratéxico a longo prazo para garantir a estabilidade financeira da entidade.