A alcaldesa da Coruña, Inés Rey, supervisou esta mañá o resultado dos traballos de reurbanización da rúa Pla y Cancela, que rematarán nas vindeiras semanas, unha vez completadas as labores pendentes en Juan Castro Mosquera e Costa da Unión, e supuxeron a renovación dunha superficie total de 6.500 metros cadrados. A rexedora estivo acompañada pola concelleira de Infraestruturas e Mobilidade, Noemí Díaz, e o concelleiro de Urbanismo, Rehabilitación e Vivenda, Francisco Díaz Gallego. Tamén estiveron presentes durante a visita veciños e veciñas da rúa e do barrio da Falperra, que participaron activamente na configuración dos espazos de lecer e descanso da rúa. De feito, este xoves foron colocados os últimos bancos da actuación.

"Esta intervención daralle un importante pulo ao barrio e a súa contorna, pois supón unha renovación integral dunha rúa clave para a mobilidade e que precisaba unha intervención urxente e en profundidade", indicou Inés Rey. As obras de Pla y Cancela supoñen a renovación de todo o firme da calzada, a ampliación das zonas peonís, a renovación da rede de recollida de augas residuais, a creación dunha nova rede de recollida de augas pluviais nun tramo de Juan Castro Mosquera (rúa na que aínda quedan algunhas labores por rematar), novo arboredo e especies vexetais e a instalación de novo mobiliario urbano. Esta actuación enmárcase dentro da estratexia do Goberno de Inés Rey de dotar os barrios da Coruña de novos espazos urbanos de calidade centrados no seu uso peonil.

Na rúa Pla y Cancela ampliáronse as beirarrúas para mellorar a súa accesibilidade nas zonas de máxima pendente. Concretamente, trabállase no tramo comprendido entre os números 26 e 28, así como no cruzamento coa rúa Juan Castro Mosquera e nos pasos peonís de dito espazo, elevándose ata un total de seis. Para mellorar a accesibilidade mantivéronse os aparcadoiros en liña en ambas as marxes entre os cruzamentos de Juan Castro Mosquera e Costa da Unión. Por outra banda, crearanse novos aparcadoiros na rúa Juan Castro Mosquera, que pasará a ser dun só sentido de circulación e estacionamento en batería e ambas as marxes.

Por outra banda, a rede de saneamento de augas residuais tamén se renova, tanto en Pla y Cancela como nun tramo da rúa Juan Castro Mosquera. Nesta última tamén se está a crear unha rede separativa de recollida de augas pluviais. No cruzamento entre Pla y Cancela con Juan Castro Mosquera, ao simplificarse a intersección entre ambas rúas, crearase unha estancia pública con novas zonas verdes e mobiliario. Tamén se mellorou a accesibilidade e seguridade das paradas do autobús con nova sinalización na vía e a ampliación da beirarrúa. Tamén se ampliaron as ablaqueacións do arborado existente para evitar o levantamento das beirarrúas e se instalaron novos bancos ao longo de Pla y Cancela. Ademais, acometéronse as podas precisas durante as obras para redimensionar o arborado e impedir molestias aos veciños e veciñas. Unha vez rematados os traballos en Juan Castro Mosquera, actuarase tamén en Costa da Unión, dando por finalizada a actuación antes do mes de xuño.

A superficie total que se renovou foi de 6.500 metros cadrados, ascendendo as zonas verdes e beirarrúas a 3.170 e a calzada a 3.400 metros cadrados. O orzamento total dos traballos ascendeu a 1,1 millóns de euros, financiados a través de fondos europeos Next Generation.