O Concello da Coruña vén de elaborar un estudo de enxeñaría consolidado para a posible implantación de enerxías renovables nas infraestruturas municipais da cidade.

En total, levouse a cabo unha análise de 198 espazos, dos cales 47 foron catalogados como viables, desde o punto de visto enerxético, para a implantación de sistemas de xeración de enerxías renovables. O estudo ten como obxectivo localizar os espazos que permitan explorar as posibilidades de xeración de enerxía reducindo emisións e tamén gasto enerxético.

O estudo tamén sinala que hai outras 28 ubicacións nas que se podería actuar pero será necesario recoller máis información sobre os seus consumos propios e asociados. Este estudo ten un carácter preliminar e agora o Concello estudará en detalle os resultados e os datos analizados do consumo eléctrico coa fin de analizar a viabilidade dos enclaves.

Segundo os datos analizados, de levarse a cabo a instalación de 41 puntos de xeración de enerxías fotovoltaicas estímase que podería acadarse unha potencia eléctrica coa que se evitaría a emisión de 4.010 toneladas de CO2 ao ano, cunha potencia instalada de 1,38 MWp. Ademais, localízanse outros seis puntos que serían viables para a instalación de xeneradores de enerxía eólica, que poderían producir 15,33 MWh/ano.

Na fase inicial deste proceso estudáronse as alternativas de xeración, os recursos dispoñibles, e se calculou o potencial de xeración renovable dentro dun escenario de máximos. A continuación, calculouse a demanda e o seu reparto, axustouse o deseño á demanda prevista e realizouse un estudo económico preliminar. Só a enerxía fotovoltaica serviría para abastecer as necesidades de suministro de 122 dependencias públicas.  

O estudo demostra o potencial da cidade para a instalación de sistemas de enerxía verde e alternativa. Agora estudaranse as alternativas para establecer se resultan viables en cada caso e para proxectar as accións precisas que permitan reducir os consumos e o abastecemento a base de enerxías limpas. 

Puntos para a potencial instalación de sistemas de enerxías renovables

• C.E.I.P. Alborada
• C.E.I.P. Concepcion Arenal
• C.E.I.P. Curros Enríquez
• C.E.I.P. Juan Fernández Latorre
• C.E.I.P. Manuel Murguía
• C.E.I.P. Maria Barbeito
• C.E.I.P. Montel Touzet
• C.E.I.P. Nosa Señora do Rosario
• C.E.I.P. Raquel Camacho
• C.E.I.P. Sagrada Familia
• C.E.I.P. San Francisco Javier
• C.E.I.P. San Pedro de Visma
• C.E.I.P. Sanjurjo de Carricarte
• C.E.I.P. Víctor López Seoane
• C.E.I.P. Wenceslao Fernández Flórez
• Centro Cívico Municipal A Silva - Ventorrillo
• Centro Cívico Municipal Os Mallos
• Centro Cívico Municipal Monelos
• Centro Cívico Municipal Monte Alto
• Centro Cívico Municipal Palavea
• Centro Cívico Municipal San Pedro de Visma
• Centro Cívico Veciñal Feáns
• Centro Municipal de Animais de Compañía - Bens
• Centro Municipal Salvador de Madariaga
• Cidade Deportiva de Riazor
• Complexo Polideportivo de San Diego
• Edificio con Locais en Glasgow 5-7
• E.I. Luís Seoane
• Fundación Luís Seoane
• Kiosco Alfonso
• Mercado Municipal de Elviña
• Mercado Municipal de Palavea
• Monte de San Pedro
• Parque de Bombeiros
• Policía Local (Xefatura Miguel Servet)
• Polideportivo de Labañou
• Polideportivo do Barrio das Flores
• Polideportivo do Ventorrillo
• Polideportivo Monte Alto
• Polideportivo Sagrada Familia
• Polideportivo San Francisco Javier
• Servizo de Promoción Económica e Emprego