O Concello da Coruña e a Asociación Española Contra o Cancro asinaron esta mañá un convenio de colaboración co obxectivo de reforzar a asistencia socioeconómica e a atención psicolóxica a pacientes de cancro e ás súas familias. Este acordo, que reafirma o compromiso de ambas as entidades coa mellora da calidade de vida das persoas que afrontan esta enfermidade, enfócase en facilitar o acceso a recursos esenciais e en minimizar o impacto emocional derivado do diagnóstico e tratamento do cancro. O Concello aporta á entidade 22.000 euros, 2.000 euros máis que o ano pasado, fondos destinados á asistencia de pacientes e das súas familias.

A alcaldesa, Inés Rey, presidiu a sinatura do convenio e reafirmou "o compromiso do Goberno municipal coas entidades sociais e sociosanitarias que levan a cabo un labor fundamental ao longo do ano". Por parte da Asociación Española Contra o Cancro estivo presente Manuel Aguilar, presidente da Xunta Provincial.

O convenio, que segue a liña de colaboracións anteriores, busca promover estratexias activas de afrontamento para os pacientes e as súas familias, que poidan ser un apoio nas súas necesidades máis básicas e contribúan ao seu benestar integral. Este esforzo conxunto entre o concello e a asociación enmárcase dentro dun contexto no que o cancro segue representando o principal problema sociosanitario, con 19.171 novos casos en Galicia o pasado ano, sendo a provincia coruñesa a que concentra a maior incidencia, con 7.841 diagnósticos, o que reflicte a necesidade urxente de apoio continuado á investigación, apoio e asistencia. Soamente na cidade da Coruña, a asociación atendeu a 477 persoas con necesidades específicas relacionadas coa enfermidade, cos seus programas e servizos gratuítos de atención psicolóxica, social, logopedia, fisioterapia e nutrición.

Na sinatura do convenio, Inés Rey e Manuel Aguilar destacaron a importancia da colaboración mutua para ampliar o alcance e a eficacia dos programas de apoio aos pacientes e ás súas familias. Este acordo non só busca mellorar a asistencia directa, senón tamén fortalecer o tecido social e comunitario arredor das persoas que afronta o cancro, asegurando recursos, ferramentas e apoio para que ninguén teña que afrontar a enfermidade en soidade. Esta firma reforza o compromiso de ambas as entidades de traballar unidas por unha sociedade onde o apoio ás persoas pacientes de cancro e ás súas familias sexa unha realidade e responda ás necesidades sociais crecentes.