O Concello da Coruña organiza un ano máis o concurso de comparsas nas modalidades de vestiario, coreografía, orixinalidade e carrozas. Esta cita consolidada no calendario festivo da cidade reunirá 26 comparsas e máis de 1.150 persoas que desfilarán polas rúas coruñesas. O concurso de comparsas forma parte do amplo abano de actividades programadas este ano polo Goberno de Inés Rey para potenciar o Antroido local.  

A cita comezará o sábado 1 de marzo ás 18.00 horas e seguirá un percorrido que partirá do porto de Calvo Sotelo (Praza de Ourense) e continuará por Sánchez Bregua, Praza de Mina, Cantón Pequeno, Cantón Grande, Avenida da Mariña, Avenida Montoto, Porta Real e finalizará na Praza de María Pita.

Con motivo do desfile, a partir das 17.30 horas habilitaranse cortes de tráfico e desvíos en diferentes puntos da cidade, incluíndo accesos como a AC-11 (Avda. Alfonso Molina), a Avda. do Exército e a Avda. de Linares Rivas. Así mesmo, o transporte público urbano e interurbano sufrirá modificacións, polo que se recomenda planificar os desprazamentos con antelación.

Consulta aquí o mapa dixital habilitado polo Concello, cos desvíos alternativos ao tráfico.

Recomendacións para seguir o desfile

Co obxectivo de garantir unha experiencia segura e cómoda para toda a cidadanía, o Concello da Coruña recomenda:

• Evitar o uso do vehículo particular para acceder ao centro entre as 17:30 e as 19:00 horas, xa que haberá cortes en puntos clave como a avenida de Alfonso Molina, avenida do Exército e Cantóns. Recoméndanse vías alternativas como a Terceira Rolda, Rolda de Outeiro ou o Paseo Marítimo. 
• Transporte público. As liñas interurbanas rematarán provisionalmente na Estación de Autobuses, e algunhas paradas de autobús e taxi na zona centro quedarán temporalmente inhabilitadas.
• Seguir as indicacións do persoal de seguridade e respectar os valos e zonas habilitadas para o público. As rúas afectadas iranse reabrindo ao tráfico progresivamente en función do avance do desfile e da presenza de público.
• Chegar con tempo para escoller unha boa localización. Debido á alta afluencia, recoméndase situarse con antelación ao longo do percorrido para garantir unha boa visibilidade e evitar aglomeracións.

Un desfile con protagonismo local e presenza de comparsas doutros concellos

O desfile de carrozas do Antroido 2025 pon en valor a tradición e creatividade das agrupacións coruñesas, que conforman a maior parte da participación. Entre elas estarán Festarrachada, Kilomberos de Monte Alto, Os Maracos e Monte Alto a 100, que presentarán propostas que combinan elementos tradicionais con innovación escénica.

Ademais, o desfile contará con comparsas de Cambre, A Laracha, Tomiño, Culleredo e Oleiros, mantendo así unha aposta por un Antroido integrador e aberto á participación doutros municipios. Entre as temáticas destacadas atópanse Astérix e Obélix, Aladdín e a súa corte, samurais e gueishas, a cerámica de Sargadelos e a maxia do fondo mariño, con carrozas que acadarán ata 12 metros de lonxitude.

Unha cita de referencia dentro do Entroido coruñés

O Concello da Coruña anima á cidadanía a participar activamente neste evento, unha das manifestacións máis multitudinarias e vistosas das festas do Entroido.

• Data: Sábado 1 de marzo de 2025
• Hora: 18:00 horas
• Percorrido: Muelle de Calvo Sotelo - Praza de María Pita

Xoves de Comadres

Por outra banda, este xoves continúa a programación do Antroido coruñés coa celebración do Xoves de Comadres, un acto organizado polas Comadres Cigarreiras de Marineda coa colaboración do Concello ao que se quixo sumar a alcaldesa da Coruña, Inés Rey. O acto comezará ás 20.00 horas na praza Coro Cantigas da Terra, no barrio de Monte Alto.

Este ano o Xoves de Comadres estará dedicado ás Mulleres das Atochas, en lembranza das mulleres anarquistas que foron asasinadas e condenadas durante a Guerra Civil por agochar nas súas vivendas a militantes libertarios e socialistas.

Previamente ao acto, colocaranse unhas cintas co nome das Mulleres das Atochas e un letreiro co nome 'Praza das Mapoulas' na praza onde comezará o percorrido. Lerase un texto de lembranza e cantarase unha canción composta para a ocasión. Todas as persoas participantes farán un percorrido ata a praza de María Pita.