Nun mundo cada vez máis urbanizado, as cidades xogan un rol crucial á hora de xerar oportunidades educativas que permitan desenvolver o potencial de todas as súas persoas  habitantes.

As Cidades Educadoras apostan por crear contextos urbanos máis inclusivos, promovendo unha visión ampla da educación ao longo e ancho da vida e maximizando o impacto educativo das súas políticas municipais.

O Día Internacional da Cidade Educadora, cuxa edición de 2024 se celebra, a nivel internacional, o vindeiro sábado 30 de novembro, trátase dunha celebración que ten como obxectivo crear conciencia sobre a importancia da educación e visibilizar o compromiso dos gobernos locais para situala como vector xerador de benestar, convivencia, prosperidade e cohesión social.

"A Cidade Educadora como laboratorio de aprendizaxes, cidadanía e transformación social", o lema da edición de 2024

Os nosos municipios convertéronse en verdadeiros laboratorios de aprendizaxes onde cada recuncho ofrece oportunidades para o coñecemento e a innovación. Ademais das bibliotecas, museos, teatros, centros comunitarios e deportivos, os parques, prazas e rúas da cidade tamén poden devir aulas ao aire libre onde se fomente o intercambio de ideas e experiencias.

En definitiva, a infinidade de aprendizaxes que se dan nos nosos pobos e cidades, móstrannos que son unha grande aula que nunca deixa de ensinar e transmitir coñecementos e valores. E estas aprendizaxes que se derivan, que contribúen a formar unha cidadanía consciente, corresponsable e activa, as Cidades Educadoras, queremos poñelas ao servizo da transformación dos nosos municipios para convertelos en lugares máis inclusivos.

Por iso, o lema para a edición da celebración do Día Internacional deste ano 2024 é: "A Cidade Educadora, laboratorio de aprendizaxes, cidadanía e transformación social".

Celebración do Día Internacional da Cidade Educadora

O Concello da Coruña, como socio da Rede de cidades educadoras, únese á celebración do Día da Cidade Educadora e destaca a oportunidade deste acontecemento para reflexionar sobre as oportunidades de aprendizaxe que as nosas cidades ofrecen e mostrarlle ao mundo o noso compromiso coa educación cidadá e a construción dun futuro mellor.

Perspectivas de persoal experto

Algúns vídeos inspiradores de persoas expertas destacadas que exploran o lema deste ano: «A Cidade Educadora como laboratorio de aprendizaxes, cidadanía e transformación social».

• Vídeo resumo

• Philippe Meirieu | Investigador, pedagogo e escritor

• Yayo Ferreiro | Antropóloga, educadora social, profesora e activista ecofeminista

• Branca Valdivia | Socióloga

• Tim Gill | Escritor e consultor especialista en xogo e mobilidade infantil

Máis información na web do Día Internacional da Cidade Educadora: https://www.edcities.org/dia-internacional-2024/