A concelleira de Emprego, Comercio e Mercados, Diana Cabanas, participou hoxe na xornada gastronómica e divulgativa organizada pola FREMSS no mercado municipal de San Agustín, unha iniciativa que contou coa colaboración do Concello.

Máis de duascentas persoas asistiron aos actos programados este sábado ao mediodía, que comezaron cunha presentación do selo de orixe 'Peixe da Lonxa da Coruña', distintivo a través do cal, desde hai tres anos, a FREMSS e o Concello traballan de forma conxunta "para visibilizar e poñer en valor o noso producto, fresco e de cercanía, e tamén ás e aos profesionais dos nosos peiraos e da lonxa da Coruña", expuxo Cabanas.

A concelleira, acompañada hoxe polo presidente da Lonxa da Coruña, Juan Carlos Corrás, recalcou a importancia de "apostar polo producto da nosa terra, visibilizando o que chega á nosa lonxa e apostando pola súa compra e consumo nos nosos fogares".

A xornada rematou cunha sesión de degustación gastronómica organizada polo equipo de profesionais da Escola de Hostalería Álvaro Cunqueiro e da Asociación de Empresarios de Hostalería da Coruña. As persoas asistentes disfrutaron, por exemplo, de rilletes de xarda sobre tostas de pan de noces e pasas, así como de uramaki, maki e temaris de xurelo.