Se queres sentir o Maratón Atlántica desde dentro, colaborar coa organización e contribuír a facelo posible, Coruña42 bríndache a oportunidade de formar parte del dentro do seu programa de voluntariado.

Achegarás o teu gran de area para que todo saia á perfección o próximo 2 de outubro e nos días previos á carreira. Coruña42 regresa despois da pandemia e necesítate para seguir crecendo.

Axudaraslles ás persoas participantes na proba, tamén na 10K que se desenvolverá en paralelo e no Mini Maratón Atlántica previsto para o sábado 1 de outubro e deseñado para menores de idade.

Ademais, hai unha oferta variada de eventos relacionados coa competición, como a Exporunning, a Pasta Party ou o Breakfast Run solidario.

O teu esforzo será, como mínimo, tan importante como o de quen participe na carreira porque, sen el, non sería posible o Maratón Atlántica.

Sentirás a satisfacción de lles axudar activamente ás persoas participantes a chegar á meta. Esa será a túa gran medalla, unha achega de carácter altruísta e indispensable.

Se tes máis de 18 anos, anímate e inscríbete aquí. O prazo para formar parte do voluntariado de Coruña42 estará aberto ata as 14:00 horas do venres 23 de setembro.