O 12 de decembro de 2025 o Coliseum acollerá a actuación de Sen Senra. Será unha das catro únicas datas que o artista galego programou para pechar o seu proxecto PO2054AZ. "A Coruña, de novo, amosa o seu potencial musical acollendo en exclusiva norte de España esta actuación dun dos artistas emerxentes máis destacados, froito do traballo do Goberno de Inés Rey por configurar unha programación cultural de calidade", sinalou Gonzalo Castro, concelleiro de Cultura e Turismo.

Con catro datas exclusivas, Sen Senra poñerá fin ao seu proxecto PO2054AZ co espectáculo 'La última misa'. O artista publicou xa dous dos tres discos que engloban este proxecto, 'El origen' e 'El emigrante', e o vindeiro ano ten previsto lanzar o terceiro volume. O galego despedirase desta triloxía cun evento de masas en catro recintos de referencia a nivel nacional.

A prevenda de entradas para o seu concerto do próximo 12 de decembro de 2025 no Coliseum terá lugar o luns, 16 de decembro, ás 12.00 horas, a través da súa páxina web www.sensenra.com. A venda xeral abrirase o martes 17 a partir das 12.00 horas, tamén a través da súa páxina web, en Ataquilla e no despacho de billetes da praza de Ourense.

O Goberno de Inés Rey continúa avanzando a súa axenda musical do Coliseum para o próximo ano. Ademais de Sen Senra, xa hai confirmados grandes artistas internacionais como Lenny Kravitz ou Alanis Morrisete. "A Coruña estase a consolidar como o motor cultural do norte de España e cada vez son máis os artistas que queren actuar aquí, o que nos permite ofrecer á cidadanía unha programación rica e variada", dixo Gonzalo Castro.