As mellores tapas do XX Concurso Picadillo, promovido polo Concello da Coruña coa colaboración de Estrella Galicia, Cash Record e a Asociación de Celíacos de Galicia, están na Taberna Triay. Hoxe púxose fin á esta edición coa entrega de premios nas diferentes categorías. A Taberna Triay, coas súas tapas 'Buñuelo a la vista' e 'Triay Wonka', recibiu o voto favorable tanto do xurado profesional como a votación do público. Malte Galera recibiu unha mención especial na categoría de Receitario Picadillo pola súa tapa 'Korokke galego'.

A alcaldesa, Inés Rey, presidiu a entrega de premios xunto co concelleiro de Cultura e Turismo, Gonzalo Castro e a neta de Picadillo, Carmen Fernández-Gago Puga. Tamén estivo a concelleira de Emprego, Comercio e Mercados, Diana Cabanas. Rey agradeceu a participación dos 44 locais que se sumaron á iniciativa gastronómica e subliñou o alto nivel do concurso de tapas máis antigo dos que se celebran en Galicia. "Somos unha cidade referente a nivel gastronómico en todo o noroeste de España e sabemos diversificar. Quen nos visita pode optar por menús especiais, comidas tradicionais, pratos de Estrella Michelín e, como non, de marabillosas tapas que forman parte da esencia dos coruñeses e coruñesas", destacou a rexedora.

Xurado do concurso

O xurado profesional desta XX edicción estivo conformado por Carmen Fernández-Gago Puga (Chau); Miguel González, membro do Grupo NOVE e chef do restaurante Miguel González (Ourense) co que alcanzou unha Estrella Michelín e un Sol Repsol; María Varela, cociñeira de A Parada das Bestas (Palas de Rei) e tamén membro do Grupo Nove; Juan Carlos Perret, cociñeiro de Kero Cocina Peruana (Vigo), quen se formou con Martín Berasategui e os irmáns Roca; e Áxel Smyth, chef do Simpar (Santiago de Compostela) recentemente galardoado coa súa primeira Estrella Michelín.

O grupo seleccionou as tapas gañadoras dun total de 10 preseleccionadas como finalistas: cinco na modalidade 'Tapa Creativa' e cinco na de 'Receitario Picadillo'. Triay gañou en ambas, na de Receitario coa tapa 'Buñuelo a la vista' e na Creativa con 'Triay Wonka', e por cada unha delas recibiu como premio 1.000 euros, un diploma acreditativo e un trofeo da Torre de Hércules. Pola súa parte, Malte Galera logrou a mención especial na categoría de Receitario Picadillo pola súa tapa 'Korokke galego'.

Votación popular

O premio á mellor tapa por votación popular tamén recaeu no 'Buñuelo a la vista' de Triay despois de ser a máis votada polo público. O premio consistiu en 500 euros e un diploma acreditativo.

Ademais, este venres celebrouse un sorteo entre as persoas que participaron nesta votación a través dun código QR que acompañaba a cada tapa en todos os locais. O sorteo levouse a cabo nun acto público en Casa de Paredes ás 9:00 horas.

Repartíronse 14 premios individuais compostos por tres lotes de produtos Cash Record, unha entrada dobre para o museo MEGA e dez packs de cociña (delantal, xogos de utensilios de madeira e un libro de cociña) máis unha tarxeta museo Coruña Card. As persoas gañadoras e as bases do sorteo atópanse na páxina web www.tapaspicadillo.es.

Unha edición especial

Nesta  XX edición do Concurso de Tapas Picadillo participaron 44 establecementos da cidade con 52 tapas: 18 delas na categoría de Tapas Creativas e 34 na de Tapas Receitario Picadillo. Entre as propostas había 19 tapas aptas para persoas celíacas e 7 para veganas.

Este ano, o certame que leva o nome de Manuel María Puga y Parga 'Picadillo', gastrónomo, xornalista e político galego que escribiu en 1905 'La cocina práctica', coincidiu co 150 aniversario do nacemento do escritor.