As comparsas Troula Seguido e Chinchetas de Meicende gañaron esta tarde os concursos de vestiario, coreografía e orixinalidade e carrozas do Antroido coruñés. O centro da cidade acolleu un desfile no que participaron 1.150 persoas e ao que asistiron 30.000 coruñeses e coruñesas.

O concelleiro de Cultura e Turismo, Gonzalo Castro, como presidente do xurado, fixo entrega a ambas comparsas do seu premio, de 1.500 euros cada un. Ademais, no concurso de vestiario, coreografía e orixinalidade tamén foron premiados Chinchetas de Meicende. Pola súa banda, no concurso de carrozas tamén obtiveron premio e mención Polilegos Carralexos.

O desfile iniciouse este ano desde o peirao de Calvo Sotelo, no Porto. As 24 comparsas e carrozas partiron dirección á praza de María Pita, pasando polos Cantóns e a Marina. O Concello coordinou un dispositivo especial de seguridade, con cortes de tráfico e desvíos que comezou ás 17.30 horas.

"O Antroido coruñés ten coma unha das súas citas de referencia este desfile do sábado, un evento multitudinario que amosa o sentimento que hai na cidade por esta festividade", sinalou Gonzalo Castro.