Concello da Coruña

Celebremos o centenario do nacemento da coruñesa María Casares (1922-2022) como actriz e personaxe pública que tivo gran transcendencia na vida social, cultural e artística na Francia do século XX e coa intención principal de que ocupe o lugar que por xustiza lle corresponde no imaxinario colectivo da nosa cidade.

"Lembro con moita máis amargura a marcha da Coruña a Madrid que a de Madrid a París."

Toda a súa vida estivo marcada pola infancia coruñesa, por ser exiliada e por ser filla de Santiago Casares Quiroga (presidente do Consello de Ministros da II República) e Gloria Pérez Corrales. Ela mesma dixo que o primeiro e máis doloroso exilio foi cando deixou A Coruña.

María Casares emprende o camiño do exilio con 13 anos e chega en novembro de 1936 a París, cidade na que estuda teatro e onde sempre se posicionará ao lado das vangardas artísticas e onde mostrará un compromiso ético, político e social coa súa orixe e coas persoas refuxiadas e cos ideais republicanos. Foi a gran dama do teatro francés do século XX.