O Concello da Coruña continúa co programa das Rutas Mariñeiras, unha iniciativa que busca dar a coñecer a actividade da Lonxa e dos mercados municipais da cidade, así como poñer en valor os produtos pesqueiros capturados pola frota local. Trátase de experiencias guiadas que achegan á cidadanía a tradición mariñeira da Coruña de forma didáctica e sensorial, fomentando ao mesmo tempo o consumo de proximidade.

"Desde o Goberno de Inés Rey seguimos apostando por iniciativas que conecten o produto local coa cidadanía e contribúan á dinamización do comercio de proximidade. As rutas mariñeiras están a funcionar moi ben e son un exemplo do potencial dos nosos mercados como espazos vivos e cargados de valor social e económico", destacou a concelleira de Emprego, Comercio e Mercados, Diana Cabanas.

Cada ruta comeza cunha visita á Lonxa da Coruña, onde as persoas participantes, debidamente acreditadas, poden asistir á poxa en directo e coñecer o seu funcionamento. Posteriormente, realízase un percorrido guiado ata un dos mercados municipais, con paradas en lugares emblemáticos da cidade nas que se explican aspectos relacionados coas artes de pesca, a sostibilidade e o control de calidade do produto.

Xa no mercado, as persoas praceiras achegan a súa experiencia directa sobre o traballo diario e as características do peixe e marisco que comercializan. A ruta remata cunha degustación especialmente elaborada para a ocasión, con receitas que mesturan tradición e innovación.

Percorridos e datas para público adulto:

• Xoves, 10 de abril: Lonxa | Efectos Navais Pombo | Mercado Eusebio da Guarda

Un percorrido que destaca a riqueza da tradición pesqueira local co mercado como testemuña viva.

• Xoves, 15 de maio | Lonxa | Parque de Oza | Mercado de Elviña

Unha ruta centrada na funcionalidade urbana e o papel do mercado como espazo cómodo e próximo

Rutas escolares:

• 24 de abril: CEIP Eusebio da Guarda | Mercado de Eusebio da Guarda
• 14 de maio: CEIP María Pita | Mercado de Elviña

O Concello organiza paralelamente visitas con escolares de diferentes centros educativos da cidade, dentro dunha aposta estratéxica por achegar á infancia o valor da tradición pesqueira e do comercio local.

A inscrición para as rutas está dispoñible na web oficial dos Mercados Municipais: Rutas mariñeiras .

O Concello da Coruña é beneficiario dunha axuda concedida ao abeiro da Orde do 28 de decembro de 2023, pola que se establecen as bases reguladoras para proxectos das Estratexias de Desenvolvemento Local Participativo (EDLP), no marco do Fondo Europeo Marítimo de Pesca e da Acuicultura 2021-2027, e concretamente para o GALP Golfo Ártabro Sur, ao que pertence o Concello da Coruña.