Programa Falamos de dinamización lingüística para os CEIP da cidade no outono de 2023

O programa de dinamización lingüística "Falamos" pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego.

OBXECTIVOS:

• Promover a utilización da lingua galega nos centros de educación infantil e primaria da Coruña.
• Asegurar a galeguización de todos os niveis do sistema educativo, tanto no ámbito docente coma no das relacións interpersoais entre os distintos membros da comunidade educativa.
• Garantir que os produtos de máxima difusión e demanda poidan chegar en galego á sociedade galega.
• Darlle ao alumnado unha visión útil e moderna da lingua galega.
• Eliminar os prexuízos lingüísticos existentes na infancia sobre o galego.

Co fin de conseguirmos estes obxectivos, o mércores 18 de outubro de 2023 imos desenvolver a seguinte actividade no auditorio do Centro Ágora:

• 3 pases escolares (10.00, 11.00 e 12.00 h) do espectáculo "Mil maxias máis", do Mago Antón, dirixidos ao alumnado de 3.º curso de primaria en diante dos CEIP públicos da cidade.

Cada centro só poderá asistir a unha función (que terá unha duración aproximada de 45 minutos). A cada pase só poderán asistir 2 centros (por orde de inscrición) con 50 alumnos/as como máximo, mais o profesorado acompañante. A inscrición faraa cada colexio dende o luns 2 de outubro ata que se esgoten as prazas, a través da web de Educación en https://edu.coruna.gal/coruna_educa_centros A actividade é de balde. O transporte (de precisalo) correrá por conta do centro.

"Mil maxias máis", do Mago Antón é un espectáculo para poñer en valor a nosa lingua utilizando xogos orixinais creados polo mago Antón coa finalidade de facer que o alumnado e profesorado espectador lembre a importancia que ten a palabra en galego.

A maxia é moito máis ca unha actividade de lecer ou unha industria cultural, é unha arte escénica que, ademais de sorprender, divertir e emocionar, pode e debe contribuír a que a fala, que é o don máis prezado que temos como galegas e galegos, non desapareza nunca. Foi Álvaro Cunqueiro, un gran mago da palabra, quen falou das "mil primaveras máis para a nosa lingua". Parece cousa de maxia dicir tanto con tan só tres palabras.

Este espectáculo quere ser unha homenaxe a Cunqueiro e tamén a todas as mulleres e homes que -cultivando a literatura, as artes, a música, ao longo da historia- sempre tiveron presente que a nosa fala era unha especie de variña máxica que tiñamos nas nosas mans para facer que Galicia durase mil primaveras máis.

Máis información en https://www.coruna.gal/lingua/gl/novas e a través de inscricionslingua@coruna.es