O éxodo, a ruína

Audiovisual e poesía, urbanismo e historias, música e pasos no asfalto xúntanse para que a escritora Emma Pedreira e o realizador audiovisual e músico X.A. Bocixa nos leven por dous mundos afastados pero que corren o mesmo perigo: a ruína e o abandono.

Desde barrios en pleno esmorecemento como o vello Orzán, Visma ou Peruleiro ata o rural espoliado das Encrobas, as casas abandonadas, o deterioro, o vandalismo, o rural destruído pola maquinaria do suposto progreso, vaise apoiando nas voces de poetas de todas as xeracións como Rosalía de Castro, Pilar Pallarés, Míriam Ferradáns, Luz Pichel, Quico, Fran Alonso.

Non só hai unha intención crítica neste paseo pola cara fea da cidade e do campo, senón ansia de atopar beleza na ruína e unha razón de procurar a historia que levou as xentes cara o éxodo e a desmemoria.