Na Coruña témoslle Apego á lingua!!

Seguimos coas nosas actividades presenciais no Centro Ágora para familias con nenas e nenos!

Velaquí a programación para os meses de marzo, abril e maio de 2025:

• "A libraría máxica", de Inventi Teatro (auditorio)  (3-6 anos) 

Martes 11 de marzo, dous pases: 17.00 e 18.30 h (50 min)

Inscrición: a partir do venres 7 de marzo, ás 10.00 h

Unha homenaxe ao pequeno comercio e ás tendas de barrio que lles achega ás crianzas o amor pola literatura e a lingua galega. Dous simpáticos libreiros, Bea Campos e Marcos Alonso, atopan os contos necesarios para cada persoa e ocasión.

• "Fíos do querer", de Cé Orquestra Pantasma  (0-3 anos)

Martes 18 de marzo, dous pases: 17.00 e 18.30 h (60 min)

Inscrición: a partir do venres 14 de marzo, ás 10.00 h

Tecendo coas agullas máxicas do amor, dos bicos, aloumiños e fermosas primeiras experiencias compartidas e celebradas foi medrando Fíos do querer, envoltorio agarimoso dun home orquestra para xogar, cantar e bailar cos nenos e coas nenas de colo.

• "Contos de igualdade (para non perder)", de Ángeles Goás  (4-6 anos)

Martes 25 de marzo, dous pases: 17.00 e 18.30 h (50 min)

Inscrición: a partir do venres 21 de setembro, ás 10.00 h 

Narración oral para a primeira infancia con mulleres protagonistas activas, fortes e intelixentes que non quedan paradas agardando que alguén as salve. Lembramos o conseguido e o que aínda queda por facer para termos un mundo máis xusto.

• "Arrolar", da Fundación Legar  (0-1 anos)

Martes 1 de abril, dous pases: 17.00 e 18.30 h (60 min)

Inscrición: a partir do venres 28 de marzo, ás 10.00 h 

Os arrolos, nanas ou cantigas de berce son cantares infantís de cariz popular, de suave rítmica e melodía que acotío se acompañan de movemento ou un axóuxere. Obradoiro no que se reforza o vínculo afectivo entre as crianzas e as persoas adultas.

• "Chimpo de ra", de Raquel Queizás  (1-3 anos)

Martes 8 de abril, dous pases: 17.00 e 18.30 h (35 min)

Inscrición: a partir do venres 4 de outubro, ás 10.00 h 

Nano é o maior e dá grandes chimpos de ra. Nona, a súa irmá pequena, cae, non sabe saltar, e Nano rise dela, pero ten celos porque agora todos os agarimos xa non son para el e quere ser pequeno outra vez. Contos con monicreques.

• "O gaiteiro verde", da Fundación Legar  (5-6 anos)

Martes 22 de abril, dous pases: 17.30 e 18.30 h (45 min)

Inscrición: a partir do venres 18 de abril, ás 10.00 h

Descubriremos a relación da música e a natureza a través dos instrumentos tradicionais e artesáns que crearemos coa materia prima máis elemental: pallas, follas, cabazas, plumas... para exercitar a coordinación e valorar a nosa contorna.

• "As máis molonas", de Pakolas  (+3 anos) 

Martes 29 de abril, dous pases: 17.00 e 18.30 h (55 min)

Inscrición: a partir do venres 25 de abril, ás 10.00 h 

Nova montaxe de espectáculo musical onde o autor, a través da voz e da guitarra e con humor, nos leva polas súas cancións máis aclamadas polo público infantil rockeiro galego, cantadas e contadas.

• "Lúa triangular, nada é imposible", de Jara Ortiz  (+3 anos) 

Martes 6 de maio, dous pases: 17.00 e 18.30 h (45 min)

Inscrición: a partir do venres 2 de maio, ás 10.00 h 

A través da música e do humor, as personaxes de Marta e a píntega Oli viaxarán ao Mundo dos Contos e transformarán a nosa realidade nun lugar mellor onde confiaremos máis nas nosas propias capacidades.

• "Leo e a música", de Trémola Teatro  (6 meses - 3 anos) 

Martes 13 de maio, dous pases: 17.00 e 18.30 h (40 min)

Inscrición: a partir do venres 9 de maio, ás 10.00 h 

Leo, o león máis curioso da selva, un día decidiu ir dar un paseo polo bosque. Camiñando, atopou unha bolboreta, un paxaro carpinteiro e ras! Será capaz Leo, coa axuda das nenas e dos nenos, de descubrir toda a música que hai ao noso redor?

• "Xela, a superheroína de aldea", de Inma Soto  (+3 anos) 

Martes 20 de maio, dous pases: 17.30 e 18.30 h (45 min)

Inscrición: a partir do venres 16 de maio, ás 10.00 h

Conto teatralizado no que coñeceremos as aventuras dunha nena valente e atrevida que vive no rural e está moi orgullosa do que descobre na natureza, das hortas e das fragas cheas de animais que ve ao seu arredor.  

• "Dende Rosalía ata as cantareiras", da Xanela do Maxín  (+3 anos) 

Martes 27 de maio, dous pases: 17.30 e 18.30 h (45 min)

Inscrición: a partir do venres 23 de maio, ás 10.00 h

Música, teatro, monicreques e narración para celebrar o Día das Letras exaltando a herdanza das mulleres homenaxeadas e sobre todo as deste ano, as cantareiras e a poesía popular oral.