Programa Falamos de dinamización lingüística para os IES da cidade 2023

O programa de dinamización lingüística "Falamos" pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego.

Normalización Lingüística ten establecida, entre as súas funcións, a de realizar diferentes programas de dinamización lingüística para avanzarmos na normalización social do galego, entre os que se atopa o programa Falamos secundaria.

OBXECTIVOS:

• Promover e fomentar a utilización da lingua galega nos centros de educación secundaria da Coruña.
• Asegurar a galeguización de todos os niveis do sistema educativo, tanto no ámbito docente coma no das relacións interpersoais entre os distintos membros da comunidade educativa.
• Garantir que os produtos de máxima difusión e demanda poidan chegar en galego á sociedade galega.
• Estimular nas xeracións máis novas actitudes favorables que se traduzan nun uso xeneralizado da lingua galega.
• Superar vellos prexuízos, presións globalizadoras e inercias negativas.
• Procurar espazos de uso e de lecer en lingua galega que sexan de calidade para o alumnado dos centros de ensino da nosa cidade.

Co fin de conseguirmos estes fins imos desenvolver a seguinte actividade para os IES municipais (ata esgotárense as prazas):

• Actuación do Leo de Matamá e o seu espectáculo didáctico "No bico un cantar", dirixida ao alumnado de secundaria ((cursos 3.º e 4.º da ESO e 1.º e 2.º de bacharelato) dos IES da cidade o venres 28 de abril das 12.00 ás 13.00 h, aproximadamente

A actividade realizarase no auditorio do Centro Ágora para 330 persoas dos centros que a demanden (por orde de inscrición).

As solicitudes de inscricións realizaranas os centros interesados a través de Coruña Educa na ficha de inscrición dende o día 17 de abril ata que se esgoten as prazas.

Deberannos indicar o número de alumnado e de profesorado acompañante, cun máximo de 60 persoas por cada centro. Confirmaráselles a inscrición aos centros por orde de solicitude ata que se complete a capacidade do auditorio.

O espectáculo didáctico "No bico un cantar" do Leo de Matamá achegaranos á historia da literatura galega dende a súa óptica de mestre, músico e poeta.

Leonardo Enrique Fernández Campos céntrase na docencia: leva por primeira vez a guitarra ás aulas aproveitando a profusión de versións musicadas da poesía galega de posguerra, que recollen os currículos de 4.º curso de ESO e 2.º de bacharelato. A partir de aí, o Leo xunta nun mesmo espectáculo o canon da música popular en galego baseada en textos poéticos e incorpora paseniño aqueles poemas da súa preferencia para traballar na clase con música e arranxos propios.

Hoxe en día prepara un disco dobre con 20 musicacións de poemas canónicos da nosa poesía, dende Afonso X a Daniel Salgado, e o espectáculo aliméntase de pezas clásicas, algunha falcatruada, selo do personaxe, e fundamentalmente versións propias. A forma en que o Leo encara as súas gravacións parte sempre da comuñón co público.

Máis información en https://www.coruna.gal/lingua/gl/novas e a través de inscricionslingua@coruna.es 

Fotografía de Christian Pérez