Aquí atopábanse os restos do antigo baluarte coñecido como "Fortaleza Vella", protexido cunha grosa muralla e obra de gran solidez no que chegou a gardarse a pólvora necesaria para a defensa da cidade. A finais do século XVIII o capitán xeneral de Galicia Carlos Francisco de Croix decidiu converter esta localización, tras a destrución no século anterior pola explosión da polvoreira, nun xardín público.

En 1830, a iniciativa do Goberno Británico, levantouse neste recinto unha arca fúnebre de pedra dedicada ao xeneral Sir John Moore e en 1834 o gobernador da praza, Don Francisco de Mazarredo transformouno construíndo o xardín actual, un xardín pechado e protexido dos ventos, que se conserva como un evocador xardín romántico.

O proxecto, realizado polo arquitecto municipal José María de Noya, define un espazo ovalado percorrido por un conxunto de camiños radiais que parten do centro, onde se sitúa a tumba. A vexetación distribúese en pequenos xardíns, onde hai plantados varios olmos centenarios monumentais incluídos actualmente no catálogo de árbores singulares de Galicia.

O xardín conserva aínda elementos da antiga fortaleza como as garitas de vixilancia ou a muralla e posúe un espectacular miradoiro orientado ao porto da cidade.

Desde o miradoiro, asomándose á galería, apréciase unha magnífica panorámica do porto e da fachada costeira da cidade.